Arrestohet një i dyshuar për sulm ndaj pjesëtarëve të KFOR-it dhe Policisë

Prokuroria Speciale e Kosovës, në koordinim me hetuesit policorë nga Drejtoria për Krime të Rënda dhe Krim të Organizuar, ka arrestuar të dyshuarin S. R nën dyshimet për sulm ndaj pjesëtarëve të KFOR-it dhe të Policisë së Kosovës në maj të vitit 2023.

“Për veprimet e mëtutjeshme publiku do të njoftohet në kohë,” thuhet në njoftimin e Prokurorisë së Shtetit.

Ndryshe, më shumë se 90 pjesëtarë të KFOR-it pësuan lëndime në protestat serbe që shpërthyen në maj të vitit 2023 në Zveçan, ku po kundërshtonin hyrjen e kryetarëve të rinj shqiptarë në ndërtesat komunale në Zveçan, Leposaviç dhe Zubin Potok – komuna në veri të Kosovës, pas zgjedhjeve të rregullta lokale që serbët i bojkotuan.