Masakra e Reçakut, Presidentja e Kosovës: Dëshmi e qëllimit shfarosës të regjimit gjenocidal të Serbisë!

Në këtë 27 vjetor të Masakrës së Reçakut përkujtojmë viktimat e kësaj masakre të llahtarshme, e cila sërish dëshmoi qëllimin shfarosës që regjimi gjenocidal i atëhershëm i Serbisë kishte ndaj popullit të Kosovës, tha Presidentja e Kosovës, Vjosa Osmani, pas homazheve që bëri me Kryetarin e Parlamentit, Dimal Basha dhe Kryeministrin në detyrë, Albin Kurti, në Kompleksin Memorial në Reçak, me rastin e 27-vjetorit të Masakrës së Reçakut.

“Në këtë 27 vjetor të masakrës së Reçakut edhe një herë përkujtojmë të gjitha viktimat e kësaj masakre të llahtarshme, e cila sërish dëshmoi qëllimin shfarosës që regjimi gjenocidal i atëhershëm i Serbisë kishte ndaj popullit të Kosovës. Reçaku dhe plagët e Raçakut akoma flasin, sepse dhimbja është ende e freskët siç ishte para 27 vitesh,” tha Vjosa Osmani aty ku dhimbja është e freskët për familjet, por edhe për gjithë popullin e Kosovës, sepse ende nuk ka pasur drejtësi për krimet që janë kryer këtu dhe në pjesë tjera të Republikës së Kosovës.

“Pas 27 vitesh Serbia vazhdon me po të njëjtat politika, me të njëjtën mendësi, sepse mohimi i krimit siç po bëjnë ata me mohimin e krimit të Reçakut është krim i dyfishtë,” tha Presidentja Osmani duke siguruar se Kosova do të vazhdojë ta mbrojë të vërtetën për Reçakun dhe për krimet e tjera të luftës, jo vetëm brenda vendit, por edhe në arenën ndërkombëtare.

“Ashtu siç dëshmoi edhe ambasadori William Walker në ditën e krimit, ajo çfarë ka ndodhur këtu ishte krim kundër njerëzimit, krim kundër popullit të pafajshëm dhe ishte dëshmi e gjallë se qëllimi i regjimit serb ishte ta zhduk popullin shqiptar nga faqja e dheut,” tha Presidentja e Kosovës, Vjosa Osmani, duke përfunduar:

“Sot jemi të lirë, sot gëzojmë pavarësinë, demokracinë në shtetin tonë sovran në tërë territorin e Republikës së Kosovës për shkak se themelet e shtetit tonë janë të forta dhe janë bërë të forta me sakrificën e martirëve të Reçakut dhe martirëve gjithandej Kosovës dhe dëshmorëve të UÇK-së, të cilët dhanë edhe jetën që ne sot ta gëzojmë lirinë. I përjetshëm kujtimi për të gjithë të rënët për lirinë tonë.”

Albin Kurti: Masakrës së Reçakut ende i mungon drejtësia

Kryeministri në detyrë i Kosovës, Albin Kurti, në përvjetorin e 27 të Masakrës së Reçakut, tha se pas kësaj masakre u vetëdijësua opinioni ndërkombëtar rreth Kosovës ndërkohë kësaj plage të hapur ende i mungon drejtësia.

“Para 27 vjetëve këtu nga Reçaku, nëpërmjet ambasadorit William Walker u jehua e vërteta për krimet e luftës, krimet kundër njerëzimit dhe krimin e gjenocidit të kryer nga Serbia si shteti, ndaj popullit shqiptar në Kosovë.

Pas Masakrës së Reçakut u ndërgjësuan, vetëdijësuan, dhe u mobilizua opinioni publik ndërkombëtar dhe kancelaritë diplomatike perëndimore. Jemi këtu së bashku, si krerë të institucioneve, me kryetarin e komunës, me kolegë nga qeveria dhe parlamenti, si dhe me zyrtarë të tjerë shtetërorë, për të shprehur dhembjen tonë për këtë plagë të hapur,  të së cilës ende i mungon drejtësia, por njëkohësisht edhe përkushtimin tonë se gjithmonë do të jemi të angazhuar për t’i sjellë kriminelët para gjyqit për t’i ndëshkuar ata për mizoritë para 27 vjetësh,” tha Kryeministri në detyrë i Kosovës, Albin Kurti, duke përfunduar:

“Lavdi 45 martirtëve Reçakut dhe 11 dëshmorëve të kombit, të udhëhequr nga komandanti  Ahmet Kaçiku.”

Ndryshe, më 15 janar 1999, në fshatin Reçak u vranë e u masakruan barbarisht 45 shqiptarë të paarmatosur.

Ish-shefi i misionit vëzhgues të OSBE-së në Kosovë, ambasadori William Walker, e pati cilësuar Masakrën në Reçak si krim kundër njerëzimit.

Në orët e hershme të mëngjesit të 15 janarit Reçaku u zgjua i rrethuar. Sipas dëshmitarëve, rreth orës 6:30 forcat serbe me artileri të rëndë kanë filluar të bombardojnë fshatin. Pas ndërprerjes së bombardimeve, forcat serbe janë futur në fshat dhe kanë filluar bastisjet.

Masakra në Reçak tmerroi botën dhe zgjoi ndërgjegjen e diplomacisë botërore duke u mobilizuar për Kosovën. 

Tmerret e shkaktuara në fshatin Reçak sollën në vëmendje të gjithë botën e civilizuar dhe shpalosi të vërtetën rreth planit gjenocidal të ish-kriminelit serb Slobodan Milosheviç.

Pas Reçakut, çështja e Kosovës u diskutua në konferencën ndërkombëtare në Rambuje e në Paris, mossuksesi i së cilës ndikoi në ndërhyrjen e NATO-së kundër forcave ushtarake serbe, largimin e tyre nga Kosova dhe vendosjen e administratës ndërkombëtare në Kosovë.