“Para nga krimi për politikë”, paditë Adriatik Lapaj, vendimi i GJKKO: Agron Shehaj nuk ka shpifur, ka fyer!

Gjykata e Posaçme e Shkallës së Parë për Korrupsionin dhe Krimin e Organizuar, GJKKO, ka shpallur të pafajshëm deputetin dhe kryetarin e Partisë Mundësia, Agron Shehaj, për veprën penale të shpifjes, në çështjen e ngritur pas deklaratave të tij ndaj kreut të “Shqipëria Bëhet”, Adriatik Lapaj.

GJKKO nuk i konsideroj shpifje deklaratat publike të Agron Shehaj se Adriatik Lapaj kishte marrë para nga krimi i organizuar, por, fyerje ndaj figurës së Lapajt, dhe e dënoi deputetin Shehaj me gjobë 300 mijë lekë.

Mbetet për tu parë nëse Vendimi i Gjykatës së Posaçme Shkallës së Parë për Korrupsionin dhe Krimin e Organizuar do të ankimohet nga palët në Apelin e GJKKO.

Njoftim:

1. I dëmtuari akuzues Adriatik Lapaj me datë 01.04.2025 ka paraqitur pranë Gjykatës kërkesën për gjykimin e çështjes penale me të akuzuar shtetasin Agron Shehaj, i akuzuar për kryerjen e veprave penale të “Fyerjes” dhe “Shpifjes”, parashikuar përkatësisht nga nenet 119/2 dhe 120/2 të K.Penal.

2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Çela, bazuar në nenet 59, 112, 379, 384, 388/1/b, 390, 393 të K.Pr.Penale, si dhe nenet 119/2 dhe 120/2 të K.Penal, me vendimin nr. 4, datë 21.01.2026 vendosi:

1. Deklarimin fajtor të të akuzuarit Agron Shehaj për kryerjen e veprës penale “Fyerja”, e parashikuar nga neni 119/2 i K.Penal dhe në bazë të kësaj dispozite dënimin e tij me 300 000 (treqind mijë) lekë gjobë.

2. Deklarimin e pafajshëm të të akuzuarit Agron Shehaj për kryerjen e veprës penale “Shpifja”, e parashikuar nga neni 120/2 i K.Penal, pasi fakti i pretenduar nuk përbën vepër penale.

3. Afati i pagimit të gjobës do të jetë 6 (gjashtë) muaj nga dita e marrjes formë të prerë të këtij vendimi.

4. Shpenzimet gjyqësore i lihet në ngarkim të akuzuarit Agron Shehaj.

5. Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar brenda 15 ditëve, afat i cili fillon nga dita e nesërme e njoftimit të vendimit.

Kujtojmë se Adriatik Lapaj e kishte paditur Agron Shehajn për shpifje, në lidhje me deklarata publike të këtij të fundit, ku ka pretenduar për lidhje të Lapajt me eksponentë të botës së krimit.

Shehaj e akuzoi Lapajn se kishte marrë 4.5 milionë lekë nga një kompani e sekuestruar nga SPAK pasi përdorej për të pastruar paratë e një grupi kriminal.

Ai mohoi akuzat duke thënë se paratë nuk i kishte marrë dhe ishin thjesht detyrime ndaj shërbimeve si avokat ndaj kompanisë në fjalë.

Përplasjet Lapaj-Shehaj

Agron Shehaj akuzon Adriatik Lapajn se ka marrë para të pista, ndërsa ka publikuar edhe disa dokumente, që sipas tij tregojnë shërbimet që kreu i “Shqipëria Bëhet” i ka bërë një kompanie në hetim nga SPAK.

“Ti ke qenë dhe je pjesë e këtij sistemi Adriatik. Unë jam si ata qindra mijëra shqiptarë që kanë vuajtur këtë shtet të korruptuar, këtë sistem të padrejtë, atë drejtësi të korruptuar ku ti ke ngrënë Adriatik. Kjo është diferenca midis teje dhe meje. Adriatik unë jam i pakapshëm”, tha Shehaj në shkurt të vitit 2025.

Por, për këto akuza reagoi Adriatik Lapaj, i cili me anë të një postimi në rrjetet sociale i quajti mashtrime ato që ka publikuar Shehaj, duke thënë se nuk ka marrë para nga krimi për politikë, por kompania që ia ka publikuar i ka para borxh për shkak të përfaqësimit që i ka bërë si avokat.

“Në fakt, kompania në fjalë nuk është e sekuestruar nga Spak. Gënjeshtra  jote e tretë! Administratori saj është nën hetim dhe është nën hetim për punë të veta që nuk lidhen as me funksionin e tij si administrator. Halli i vet! Shërbimi im si avokat është për kompaninë afro 2 vite para se administratori saj të merrej nën hetim. Kontrata është me kompaninë dhe jo për punët e Administratorit. Gënjeshtra jote e katërt! Kjo për të qenë korrekt, se unë dhe sot mund ta përfaqësoj pa problem atë kompani ose administratorin e saj edhe në Spak se kjo është puna ime. Përfaqësues ligjor! Avokat”, shkruan Lapaj.

Teksa e paralajmëroi asokohe se do ta çonte në gjykatë, Lapaj iu drejtua duke i thënë;

“Ti që hyre në politikë pa të njohur askush e pas 8 viteve deputet bën revolucionarin duke më thënë mua që nuk kam punuar 1 ditë në shtet se unë jam sistemi që ty të paska nxirë jetën! Luftë kërkove, luftë do kesh! Dmth kur nuk pyes shefin tënd Saliun, ty do e shohësh rrugës çfarë të kam!”.