Haradinaj nga Vlora: Korrigjimi i kufijve, i papranueshëm!

Deri sa Presidenti i Kosovës Hashim Thaçi vazhdon me konferencat pa fund për shtyp në Prishtinë dhe manipulimin e opinionit me propozime nga më të ndryshmet, kryeministri Ramush Haradinaj edhe nga qyteti i Vlorës rikonfirmoi qëndrimin e tij të palëkundur për idenë e korrigjimit të kufijve.

“Për fat të keq të popullit të Ballkanit, luftërat kanë qenë tragjike në të kaluarën. Realiteti i sotëm është krejtësisht rezultati i atyre luftërave. Ne duhet të konsiderojmë arritjet tona, ndaj mendoj se hapja e temës së korrigjimit të kufijve, është e papranueshme për mua.”

Kryeministri i Kosovës në qytetin e Vlorës u prit nga kryetari i bashkisë, Dritan Leli, më pas vendosi kurora me lule në varrin e Ismail Qemalit, për vazhduar qëndrimin në këtë qytet duke vizituar Muzeun e Pavarësisë. Nuk dihet nëse Haradinaj do të takohet apo jo me kryeministrin shqiptar, Edi Rama, i cili aktualisht po qëndron në Dhërmi.