Orteku godet trenin në Zvicër, e nxjerr nga shinat. Ka të lënduar

Një tren doli nga shinat pranë Goppenstein në Alpet jugore të Zvicrës mëngjesin e sotëm, mendohet se ka shumë të lënduar, tha policia lokale.

“Goppenstein, ora 7 e mëngjesit, treni doli nga shinat, ka shumë të lënduar, reagimi emergjent është duke u zhvilluar, më shumë informacion së shpejti,” u shpreh policia kantonale e Valais përmes mediave sociale.

Kur u kontaktua nga AFP, policia tha se nuk kishte informacione të mëtejshme në këtë kohë mbi rrethanat e aksidentit ose numrin e të lënduarve.

Shkaku i ortekut
Në faqen e saj të internetit, Hekurudhat Federale Zvicerane (SBB) deklaruan vetëm se shërbimet e trenave ishin “ndërprerë midis Goppenstein dhe Brig” për shkak të një orteku.

Rreth 80 persona ishin në bordin e trenit BLS AG kur ndodhi aksidenti.

Treni u nis nga Spitz në orën 6:12 të mëngjesit dhe po shkonte drejt Brig kur doli nga shinat rreth orës 7 të mëngjesit. Një zëdhënës i BLS tha për “20 Minuten” se shkaku i aksidentit ishte një ortek, duke shtuar se pasagjerët do të evakuohen së shpejti.