Presidentja Osmani: Prania e KFOR-it amerikan është jetike për stabilitetin në Kosovë!
Prania e Ushtrisë së Shteteve të Bashkuara si pjesë e misionit të KFOR është jetike për paqen, sigurinë dhe stabilitetin në Kosovë dhe rajon, tha Presidentja Vjosa Osmani në takimin lamtumirës me komandantin e Komandës Rajonale Lindje të KFOR-it, kolonelin Jonathan Lloyd nga Garda Kombëtare e Louisiana, si dhe me pasuesin e tij, kolonelin Sam Sargeant.
“Mirënjohje e thellë, në emër të popullit të Kosovës, për vazhdimin e pranisë së Ushtrisë së Shteteve të Bashkuara në vend, kjo prani është jetike për paqen, sigurinë dhe stabilitetin në Kosovë dhe rajon.
Kosova do të mbetet gjithmonë mirënjohëse ndaj SHBA-së për mbështetjen e palëkundur në të gjitha etapat,” tha Presidenja e Kosovës, Vjosa Osmani, ndërsa falënderoi kolonelin Lloyd për shërbimin dhe përkushtimin e tij gjatë mandatit në Kosovë, duke vlerësuar kontributin e tij në forcimin e sigurisë dhe stabilitetit në vend dhe rajon. Në shenjë mirënjohjeje, ajo i ndau atij një mirënjohje për angazhimin e çmuar.
Me këtë rast, Presidentja Vjosa Osmani i uroi mirëseardhje kolonelit Sam Sargeant, duke e siguruar për mbështetjen e plotë të institucioneve të Kosovës në përmbushjen e mandatit të tij dhe të misionit të KFOR-it, të udhëhequr nga NATO.
