Pas kontrollit të shtëpisë, arrestohet vëllai i Ish-Presidentit të Malit Zi

Biznesmeni dhe vëllai i Ish-Presidentit të Malit të Zi, Aco Gjukanoviç, u arrestua në orët e para të ditës sotme, pasi dje policia kontrolloi pronën e tij në Nikshiç dhe Podgoricë.

Lajmin e konfirmoi televizioni publik i Malit Zi, RTCG, duke shtuar se ai sot u dërgua në Prokurorinë Themelore në Nikshiç për t’u marrë në pyetje.

RTCG raporton se gjatë kontrollit të shtëpisë në Nikshiç, policia gjeti armë dhe pajisje shpërthyese, disa pushkë si dhe pajisje policore.

Më herët dje, policia rrethoi ndërtesën në qendër të Podgoricës ku jeton Aco Gjukanoviç, ku zhvilloi kontroll nga ora 13:00 deri në orën 19:00.

Godina në fjalë ndodhet në rrugën Vuk Karaxhiç ku ndodhen dhe ambientet e bankës Prva Banka ku Aco Gjukanoviç është aksioneri kryesor.

Ndryshe, mediat në Mal të Zi kujtojnë se Aco Gjukanoviç është aksioneri më i madh i bankës Prva Banka, e cila ka qenë në qendër të vëmendjes së publikut për vite me radhë për shkak të ndihmës shtetërore në vitin 2008 dhe dyshimeve në lidhje me metodën e kthimit të këtyre parave.

Gjatë asaj periudhe, Partia Demokratike e Socialistëve, DPS, e udhëhequr nga Milo Gjukanoviç, ishte në pushtet në Mal të Zi. Pasi partia e vëllait të tij, Milo Gjukanoviç, u mund në zgjedhjet e vitit 2020, Aco Gjukanoviç u zhvendos në Luksemburg, pastaj në Itali. Mediat raportojnë se ai mbërriti në Mal të Zi disa ditë më parë.