Tiranë, tritol makinës së 36-vjeçarit që jeton mes Shqipërisë dhe Spanjës

Një shpërthim me lëndë plasëse është regjistruar në orët e para të mëngjesit të sotëm (10 mars) në Tiranë.

Sipas informacionit paraprak të policisë, ngjarja ka ndodhur në rrugën “Vasil Ndocka”. Dyshohet se një sasi lënde plasëse ka shpërthyer në automjetin në pronësi të shtetasit Olsion Klosi 36 vjeç. Aktiviteti i tij në Spanjë mund të jetë dhe një nga motivet e mundshme të vendosjes së lëndës plasëse, raporton BW.

Autori i dyshuar është fiksuar nga kamerat e sigurisë në momentin kur vendos lëndën plasëse në automjet. Sipas pamjeve, ai ka mbërritur në vendngjarje me biçikletë dhe është larguar po me biçikletë menjëherë pasi ka vendosur tritolin.

Nga shpërthimi nuk raportohet për persona të lënduar, ndërsa janë shkaktuar vetëm dëme materiale.

Policia ka nisur hetimet për identifikimin dhe kapjen e autorit, ndërsa po verifikohen edhe pamjet e kamerave të sigurisë në zonë për të zbardhur plotësisht rrethanat e ngjarjes.

Tiranë/Informacion paraprak

Më datë 10.03.2026, rreth orës 01:50, në rrugën “Vasil Ndocka”, dyshohet se ka shpërthyer një sasi lënde plasëse në automjetin e parkuar në pronësi të shtetasit O. K., 36 vjeç.

Nga shpërthimi nuk ka persona të dëmtuar, vetëm dëme materiale.

Grupi hetimor po punon për sqarimin e plotë të rrethanave të rastit.