Të pandehur për korrupsion dhe pastrim parash, GJKKO kalon për gjykim Dosjen Meta-Kryemadhi

Gjykata e Posaçme e Apelit për Korrupsionin dhe Krimin e Organizuar, GJKKO, pranoi kërkesën e Prokurorisë së Posaçme kundër Korrupsionit dhe Krimit të Organizuar, SPAK, dhe kaloi për gjykim në themel dosjen penale ndaj Ish-Presidentit Ilir Meta, ish-bashkëshortes së tij Monika Kryemadhi dhe tre të pandehurve të tjerë.
Meta dhe Kryemadhi do të gjykohen me procedurë të zakonshme, për akuzat e korrupsionit, pastrimit të parave dhe fshehjes së pasurisë, lidhur me çështjen CEZ-DIA dhe kontratat e lobimit me Shtetet e Bashkuara të Amerikës.

Ndërsa të pandehurit, Fatima Kryemadhi, Ema Coku, nën akuzë për pastrim parash dhe Piro Xhixho, i pandehur për korrupsion, kanë kërkuar gjykim të shkurtuar dhe pritet që të gjykohen veçmas nga ish-çifti Meta-Kryemadhi.

Ish-Presidenti Ilir Meta mohon akuzat dhe pretendon se procesi ndaj tij është i motivuar politikisht. ish-bashkëshortja e tij, Monika Kryemadhi, tha se e priste vendimin dhe për të spati asnjë surprizë.

Ndryshe, seanca paraprake për kalimin ose jo të dosjes për gjykim zgjati 8 muaj. Ilir Meta mbahet në paraburgim prej tetorit të 2024, ndërsa të pandehurit e tjerë janë hetuar në liri.