Imperializmi Rus, Selanik e tatëpjetë…

nga Agim Popoci

Humbi Imperializmi Amerikan! Kjo pikë në Budapest derdhi gjithë çmendurinë politiko-fetare në hapsirën shqiptare që filloi me përfundimin e luftës në Kosovë, betejën e Serbisë për ndarjen e Veriut të Kosovës, zhvillimeve në Lindjen e Mesme, dhe përmbyti mediat me ndryshimin e pushtetit në Hungari!

Që në krye të herës duhet thënë se humbësi më i madhe i zgjedhjeve në Hungari është Imperializmi Rus, dhe, për këtë flasin shifrat e investimeve dhe përfitimet ruse dhe jo teoritë e Leninit, gjithsesi, ky është problem hungarez!

Në hapësirën shqiptare, për fat të keq, akuzat kundër Imperializmit Amerikan tashmë po marrin përmasa serioze jo vetëm pse vijnë nga kokat e mëdha kombëtare të Facebookut nga Tirana, Prishtina, Shkupi, Presheva e Ulqini, por, sepse me fillimin e përhapjes nëpër rrjetet sociale në emër të diasporës shqiptare në kryeqendrat më të mëdha të Perëndimit, ato lëshuan rrënjë të thella aty ku intelektualët e vërtetë kishin heq dorë nga ballafaqimi me injorantët që veten guxojnë ta quajnë historian e madje edhe studiues, dhe, argumentimin e tyre e shoqërojnë me ndjeshmëri për humbjen e jetëve myslimane nëpër botë duke akuzuar si fajtor Imperializmin Amerikan, pa e gjetur asgjëkundi si fajtor për vrasjen as edhe të një myslimani të vetëm, Imperializmin Rus; Ndonëse bëri kërdi përveç se në Bosnje, Kosovë dhe Maqedoni të Veriut, edhe në Armeni, Afganistan,  Çeçeni e Siri!

Peshën e seriozitetit e tregoi rasti i fundit marsin e këtij viti, kur shqiptarët u përballën me grafitin në objektin e Fakultetit Juridik në Prishtinë, “Poshtë Imperializmi Amerikan”; Përveç se një masturbim marksist-leninist që jo rrallëherë shihet në rrjetet sociale, ky ishte një alarm për kontaminimin e hapësirës shqiptare me broçkulla të Leninit,  pa e vrarë njeri mendjen se po ndodhin në një terren ideal të ndryshimeve gjeopolitike dhe krijimit të një rendi të ri botëror, që kulmuan dhe me akuzat për Imperializmin Amerikan duke vënë në dyshim arsyet e çlirimit të Kosovës!

Po, po, broçkulla të Leninit, për të cilat vazhdojnë e vuajnë jo vetëm shqiptarët por e gjithë Evropa, ndërkohë kokat e mëdha shqiptare të Facebookut nuk e pyetën veten kurrë pse pas luftës së dytë botërore Gjermania u shpallë menjëherë antisemite dhe u pranua nga e gjithë bota si e tillë, dhe askush nuk dëgjojë aromë Imperializmi Rus edhe kur Rusia u ul me komunizmin e saj të përgjakshëm,  këmbëkryq në Berlin e vërdallë deri në Selanik!  

“Imperializmi është kapitalizëm që ka arritur atë fazë zhvillimi në të cilën formohet mbizotërimi i monopolit dhe kapitalit financiar, eksporti i kapitalit merr rëndësi të madhe, fillon ndarja e botës midis trusteve ndërkombëtare dhe ndarja e të gjithë botës. Hapësira midis vendeve më të mëdha kapitaliste është tashmë e përfunduar,” ishte postulati i Vladimir Leninit që jo vetëm liderëve evropianë të kohës por as atyre pas luftës së dytë botërore nuk u la vend të flasin për Imperializmin Rus, të cilit krimineli Lenin vetëm i ndryshoi emrin, Internacionalizëm!

Dhe, askush nga këto koka të mëdha nuk tha pse pas Revolucionit të Tetorit të vitit 1917, bolshevikët shpallën fundin e Imperializmit Rus por luftuan brutalisht për të ruajtur kufijtë perandorakë të Rusisë, asaj që quhej Roma e Tretë, dhe ripushtuan shtete të pavarura të sapoformuara si Ukraina, Gjeorgjia, Armenia dhe Azerbajxhani; Apo sërish vranë shumë myslimanë dhe po konkurronin shifrat e propaganduara komuniste për Perandorinë Osmane, gjë të cilën Partia nuk e lejon përderisa kryefjalë ishte narrativi për Bashkimin Sovjetik antikolonial!

Për të gjithë ata që përgjigjen mund ta kërkojnë në frymën e rendit të ri botëror dhe mbizotërimin e komunizmit, këtë realitet  më së miri e sqaron historiani dhe studiuesi i ndërtimit të kombit perandorak sovjetik, Ronald Gregor Suny, në intervistën e dhënë në vitin 2017.

“Para fundit të viteve 1980, askush nuk interesohej për jorusët. Sovjetologjia dhe studimet sovjetike ishin për qendrën dhe majën – kush mendonte çfarë për Kremlinin, mauzoleun e kështu me radhë.”

Por, para se të sqarohet ndikimi i Imperializmit Rus në përgjakjen e hapësirës shqiptare dhe jo vetëm, kokave bosh dhe atyre që mendojnë se janë më të besuar sepse quhen Antikomunist, duhet sqaruar faktin që e konfirmon pikërisht historia, se asnjëri prej tyre nuk është detyrimisht Antikomunist vetëm pse ishte i dënuar politik nga krimineli Enver Hoxha, aq më pak nëse u konsiderua kulak, dhe, u hodh në lumin e të internuarve pa fund për qejfin e një Sekretari injorant të Partisë; Dhe jo vetëm kaq! E bënë pis hapësirën shqiptare edhe kur i dhanë vetes të drejtë të quhen edhe Demokrat, dhe, me ose pa dashje i shërbyen Sigurimit të Shtetit, pra, Moskës zyrtare!

Sot për të kuptuar ndikimin e Imperializmit Rus duhet të kuptojmë se kush është vërtetë Rusia, jo ajo që na e mësuan injorantët komunistë, histori e cila vetëm ndër shqiptarë nuk korrigjohet, madje edhe për rusët është e papranueshme.

Edhe kur u shpërbë Bashkimi Sovjetik në vitin 1991, shtypja nga Imperializmi Rus ishte një çështje e vjetëruar në mendjet e perëndimorëve, dhe gjithçka ishte përqendruar në rënien e eksperimentit internacionalist, thjeshtë skadimin e tij.

Shumë historianë perëndimorë nuk e konsideruan Bashkimin Sovjetik si një regjim që zhduku rende të ndryshme shtetërore dhe lëvizje kombëtare, por si një projekt politik që krijoi dhe zhvilloi kombe. Por, ka vepra, që sikur të ishin lexuar nga këto koka kombëtare që sot kontaminojnë hapësirën shqiptare së bashku me ndjekësit e tyre, do të shmangnin ndikimin e Imperializmit Rus, si dhe do të kontribuonin në ruajtjen e vlerave tona kombëtare që janë fituar me shumë therorësi dhe gjakderdhje.

Ronald Grigor Suny me veprën e tij “The Revenge of the Past” dhe Andreas Kappeler Russia me “Multinational Empire” vunë në dukje politikat e dhunshme bolshevike ndaj popujve të kolonizuar dhe rezistencës së tyre, ndërsa shkruar nga këndvështrimi i të kolonizuarve, parashikuan dhe paralajmëruan saktë vazhdimësitë historike dhe rreziqet që Rusia sot përfaqëson për këto kombe, si Von Hagen në “Does Ukraine Have a History?” dhe Timothy Snyder në “Bloodlands”.

Por, miti i Bashkimit Sovjetik si ndërtues kombesh në Perëndim promovoi idenë se Rusia ka një sferë ndikimi, ku ka të drejtë të ndërhyjë. Kjo mund të jetë arsyeja pse Perëndimi i konsideronte normalitet luftërat gjenocidale që Boris Jelcin dhe pasardhësi i tij Vladimir Putin i zhvilluan në Çeçeni, në vend që të shihnin njerëz që pretendonin sovranitet dhe shtetësi. Perëndimi pranoi dhe portretizimin e çeçenëve si banditë, nacionalistë dhe terroristë sepse nuk i shikonin ambiciet perandorake ruse në Evropën Lindore, por këtyre historianëve që arsyetimin e shoqërojnë me ndjeshmëri fetare, kjo nuk mund t’ju falet!

Dhe, derisa studiuesit shqiptarë heshtën, këtë nuk e bënë studiuesit rus, të cilët e pranuan se janë bërë gabime, siç u shpreh së fundi, Prof.Susan Smith Peter.

“Si studiues rusë, ne duhet të pyesim veten vërtet se në çfarë mënyrash e kemi marrë pikëpamjen e shtetit rus si të paracaktuar. Dhe në çfarë mënyrash kemi marrë pjesë në glorifikimin e shtetit rus që Putini e ka çuar në një ekstrem patologjik? A ka marrë pjesë fusha jonë e studimit në trajtimin e Ukrainës si një shtet pa histori në mënyrën e vet?”

Nevojën për  korrigjim e kemi edhe ne vetë shqiptarët, jo vetëm për të kuptuar Imperalizmin Rus në Çeçeni dhe Armeni, por edhe atë në Serbi, Hungari e Republika Srpska, që mos të vijë më pandehur asnjë rus si ushtarë i forcave serbe në Kosovë, forcave maqedone në Maqedoni, dhe as Imperalizmi Rus si financues i propagandës antiamerikane si përmes sentimentit fetar ashtu dhe atij ekonomik, në celular, TV, objektet e kultit ose familje, ku përfundimisht do të jetë vonë!       

Ndryshe, nuk do të përsërisim shprehjen dëshpëruese nga koha e Reformave të Tanzimatit, “Selanik e tatëpjetë, siç ka qenë do të jetë”, por do ta shohim Shqipërinë me sytë tanë, atë që e tha Kryeministri Edi Rama për Veriun e Kosovës dhe u irrituam, ndërsa janë politika dhe praktika të Imperalizmit Britanik, koncepti:

Terra nullius*!

*Shprehje nga e Drejta Romaket: Tokë e Askujt!