Video/ Rumani, qytetarët protestojnë në shesh dhe jo në rrjete sociale…

Derisa shqiptarët vazhdojnë të protestojnë përmes rrjeteve sociale, në shtetet tjera, për korrupsion protestohet në rrugë.

Qindra mijëra rumunë, shumica prej të cilëve emigrantë që janë kthyer pikërisht për këtë protestë, kanë kërkuar mbrëmë në Bukuresht dorëheqjen e qeverisë së qendrës së majtë, të cilën e akuzojnë për korrupsion.

Gjatë protestës pati edhe përplasje me forcat e rendit.

Rreth 100 mijë

“Dorëheqje!” dhe “Hajdutë!” dëgjohej nga protestuesit për të cilët mediat raportojnë se ishin mbledhur rreth100 mijë para parlamentit.

Dhjetëra prej tyre bënë përpjekje për të kaluar pengesën që kishte vënë policia, me këtë rast policia përdori gaz lotsjellës për ti larguar.

Pati dhe përplasje me policinë ku mbetën të lënduar më shumë se 250 vetë. Dhjetëra prej tyre morën ndihmë mjekësore për shkak të asfiksimit nga gazi, e dhjetëra policë raportohet se janë lënduar nga gurët dhe shishet që kishin gjuajtur protestuesit.

Problemi kryesor korrupsioni

Me flamurin spanjoll në duar, 30-vjeçarët Stefan dhe Ileana Anghel që jetojnë Spanjë, kanë ardhër vetëm për të marrë pjesë në këtë protestë. Ata theksojnë se asgjë nuk ka ndryshuar në Rumani, se nuk ka rrugë dhe shkolla moderne dhe se gjithandej ka korrupsion.

Një çift gjashtëdhjetëvjeçar në “festën e diasporës” ka ardhur nga New Yorku ku jetojnë më shumë se 30 vjet. Edhe ata theksojnë se korrupsioni dhe keqpërdorimi i parave janë problemet më të mëdha të këtij vendi.

Mijëra njerëz kanë protestuar edhe në qytetet tjera.

1/5 e rumunëve punojnë jashtë shtetit

Sipas të dhënave zyrtare, rreth 4 milionë rumunë, nga gjithsejtë 20 sa ka Rumania, punojnë jashtë shtetit, gjysma prej të cilëve në Itali dhe Spanjë.

Gjatë vitit të kaluar, ata i kanë dërguar familjeve të tyre në Rumani,  4.3 miliardë euro, ose rreth 2.5 për qind të Prodhimit të Brendshëm Bruto, GDP, të vendit,  njërës prej shteteve më të varfëra në Evropë.