Zgjedhja e Presidentit, ende s’ka emër konsensual, afati kushtetues drejt fundit

Kosova tashmë është duke u përballur me presion kohor për zgjedhjen e Presidentit, pasi nesër në mesnatë përfundon afati kushtetues.

Kryeministri i Kosovës, Albin Kurti, ka shmangur një përgjigje të drejtpërdrejtë lidhur me mundësinë e mbështetjes së Vjosa Osmani si kandidate për presidente, ndërsa edhe vetë Ish-Presidentja e Kosovës nuk ka pranuar të flasë për çështjen e presidentit.

Duke shkuar në homazhe pranë Monumentit dedikuar Personave të Zhdukur me dhunë gjatë luftës, Vjosa Osmani kërkoi që ato të respektoheshin.

Ndërkohë, vendi po përballet me afatin e mbetur për zgjedhjen e presidentit të ri.

Deri më tash, partitë politike nuk kanë arritur konsensus për një emër që do të siguronte pjesëmarrjen e së paku 80 deputetëve në procesin e votimit.

Në përpjekje për të zhbllokuar situatën, Lëvizja Vetëvendosje u ka bërë ofertë dy partive kryesore opozitare, Partia Demokratike e Kosovës, PDK, dhe, Lidhja Demokratike e Kosovës, LDK, që të propozojnë tre kandidatë për postin e presidentit. LVV është zotuar se do t’i sigurojë nënshkrimet e nevojshme për formalizimin e kandidaturave dhe do të mbështesë njërin prej tyre në votim.

Kjo ofertë nuk është pritur njësoj nga opozita. PDK e ka refuzuar ndërsa LDK ka vendosur kushte, duke përmendur në mënyrë specifike emrin e Vjosa Osmanit si kandidate të mundshme.

Ndryshe, Vjosa Osmani këtë muaj përfundoi mandatin e saj pesëvjeçar si Presidente e Kosovës.