Kosovës, sot seanca për zgjedhjen e Presidentit

Parlamenti i Kosovës sot do të mbajë seancë të jashtëzakonshme plenare, ku në rend dite është diskutimi për çështjen e Presidentit të Republikës së Kosovës.

Sipas urdhërit të firmosur nga Kryetarja e Parlamentit, Albulena Haxhiu, seanca do të mbahet sot duke filluar në orën 17:00.

Në njoftim bëhet e ditur se në seancë janë ftuar të gjithë deputetët, ndërsa në Rendin e Ditës është vetëm një pikë e vetme: Diskutimin lidhur me zgjedhjen e presidentit!

Bazuar në deklaratat publike deri në mesditë emër konsnesual nuk ka, por nga lëvizjet e fundit në mes të Lëvizjes Vetëvendosje dhe Partisë Demokratike të Kosovës mund të ketë edhe tym të bardhë!

Ndryshe, deputetët e legjislaturës së X-të kanë afat deri nesër në mesnatë të zgjedhin Presidentin e ri, në të kundërtën, sipas vendimit të Gjykatës Kushtetuese, Kosova shkon në zgjedhje, të cilat duhet të mbahen brenda 45 ditësh.

Oferta e fundit e liderit të Lëvizjes Vetëvendosje, Albin Kurti, për dy partitë opozitare, Partisë Demokratike të Kosovës dhe Lidhjes Demokratike të Kosovës, ishte të paraqesin tre propozime për President, të cilët duhet të jenë figura unifikuese dhe jopartiake.

Lideri i PDK-së, Bedri Hamza e refuzoi ofertën duke e cilësuar joserioze, ndërsa ai i LDK-së, Lumir Abdixhiku, tha “nëse doni marrëveshje politike me LDK-në, atëherë flisni me ne. Presidentin e propozojmë ne me plot përgjegjësi. Mund ta propozojmë edhe Vjosa Osmanin, nëse na i garantoni 66 vota për të.”