Me Komitetin Ushtarak, Kurti: NATO, orientim strategjik dhe destinacion!
NATO nuk është vetëm garantues i sigurisë, por orientim strategjik dhe destinacion, tha Kryeministri i Kosovës, Albin Kurti, në takim me delegacionin e NATO-s kryesuar nga kreu i Komitetit Ushtarak të NATO-s, Admirali Giuseppe Cavo Dragone, dhe kreu i Komitetit Ushtarak të Bashkimit Evropian, CEUMC, Gjenerali Sean Clancy.
Duke falënderuar për angazhimin dhe përkushtimin e vazhdueshëm të NATO-s për paqe e stabilitet në Kosovë dhe rajon, Kryeministri Kurti theksoi se roli i KFOR-it mbetet thelbësor jo vetëm për sigurinë e vendit, por mbarë rajonit.
“Për Kosovën, NATO nuk është vetëm garantues i sigurisë, por orientim strategjik dhe destinacion. Sa i përket procesit të integrimit evropian, krahas politikës së pranimit, duhet t’i kushtohet rëndësi edhe dëshirës për anëtarësim,” tha Albin Kurti ndërsa theksoi bashkëpunimin e ngushtë të Forcës së Sigurisë së Kosovës me NATO-n.
Duke fol për rritjen e nivelit të sigurisë në vend, me theks në veri, Kryeministri i Kosovës, Albin Kurti, në kontekst rajonal përmendi synimet destabilizuese të Serbisë të mbështetur nga Rusia.
Takim me anëtarët e Komitetit Ushtarak të NATO, kryesuar nga Admirali Giuseppe Cavo Dragone, si dhe kryetari i Komitetit Ushtarak të Bashkimit Evropian, CEUMC, Gjeneral Sean Clancy, zhvilloi dhe ministri i Mbrojtjes, Ejup Maqedonci.
Zhvillimet aktuale të sigurisë, zhvillimi i Forcës së Sigurisë së Kosovës dhe kontributi i Kosovës në funksion të sigurisë rajonale dhe globale, ishin temë e diskutimit ku ministri Maqedonci theksoi synimin strategjik të Kosovës për anëtarësim në Bashkimin Evropian dhe NATO.
Ndryshe, delegacioni i Komitetit Ushtarak të NATO u informua për objektivat strategjike të Ministrisë së Mbrojtjes për katër vitet e ardhshme, të fokusuara në zhvillimin e mëtejmë të kapaciteteve të FSK-së, zbatimin e mbrojtjes gjithëpërfshirëse, zhvillimin e industrisë së mbrojtjes, bashkëpunimin ndërkombëtar dhe vetëqëndrueshmërinë.
