Epoka Kurti mori fund! Konsensusi rikthehet në jetën politike në Kosovë!

Fundi i Epokës Kurti mund të parashikohej, por, askush nuk ka mundur ta parashikoj pas zgjedhjeve të 28 dhjetorit 2025 se fundin kësaj Epoke do t’ja shkaktoj vetë lideri i Lëvizjes Vetëvendosje, Albin Kurti!

Por, në daljen e tij publike mbrëmë, kur u pa e qartë se po dështon edhe seanca e orës 19:00, kaosin politik e dekoroi me konfuzion, ku nuk ishte e qartë se po fliste një komedian apo një lideri i fuqishëm i cili ka marrë besimin e 51% të qytetarëve dhe nuk po kupton se çka është vota!

Ndryshe, kur kishin mbetur vetëm 4 orë nga skadimi i Epokës Kurti dhe vijimi i jetës politike në Kosovë me zgjedhjet e reja, Albin Kurti me koalicionin e tij qeverisës me 66 deputetë i kërkoi LDK-së që kishte 15 deputetë dhe një kandidatë për ta propozuar, të vijë në seancë dhe pastaj do të shikohet në kutinë e votimit se cili kandidatë ka më shumë vota!

Në këto momente, askush nuk mund të thoshte se në Kosovë nuk ka të çmendur, por, lideri i LDK-së që kishte përballë me 15 firma deputetësh në dorë, Lumir Abdixhiku, duke përfshirë edhe gazetarët me mikrofon në dorë që po dëgjonin këto lloj marrëzish që dilnin nga goja e Albin Kurtit, ende nuk janë çmendur në atë masë sa mos ta dinë se 15 mandate janë më pak se 66 mandate, dhe, është Abdixhiku ai cili me padurim po priste ta shpëtoj Qeverinë Kurti pavarësisht se cilat janë arsyet që elektorati i LDK-së i ka besuar votën!

Albin Kurti vazhdoi ta tund suksesin e tij me 51% të votave të fituara dhe 66 mandate që ka koalicioni i tij qeverisës, por, jo edhe ta peshojë këtë sukses në garë presidenciale ku i duhen 80 vota për ta zgjedhur Presidentin, dhe, nuk i ka!

Dhe, për fat të keq, Albin Kurti nuk e ka as idenë e Konsensusit!

Fundjavën që shkoi, shumë qytetarë ngelën të habitur pse asnjëra nga partitë e mëdha opozitare, si LDK ashtu dhe PDK, nuk e pranoi ofertën “bujare” të Albin Kurtit për të bashkëqeverisur si dhe Kryetarin e Parlamentit, por, mbrëmë u pa se të dy liderët e këtyre partive opozitare, Lumir Abdixhiku dhe Bedri Hamza, kishin të drejtë!

Lumi i akuzave mbi opozitën pas këtij refuzimi nga mbështetësit e Lëvizjes Vetëvendosje në rrjetet sociale dëshmuan se Albin Kurti nuk ka ndryshuar strategjinë e Dhjetorit 2025 ku arriti ta kthej në favor moskrijimin e institucioneve duke akuzuar opozitën!

Dhe, më të goditurit të zgjedhjeve të 28 Dhjetorit 2025, liderit të LDK-së Lumir Abdixhiku, tashmë nga paaftësia, Albin Kurti i mundësoi që të ringjallet si me idenë ashtu dhe lidershipin e tij dhe të sjellë 15 firma deputetësh me një propozim konkret që tashmë ishte dhe publik, Vjosa Osmanin!

Lumir Abdixhiku sjelli firmat dhe emrin e kandidatit, por, vrasësi i Epokës Kurti, Albin Kurti, i bëri të qartë Lidhjes Demokratike të Kosovës dhe opinionit të gjerë se me ardhjen e këtyre 15 deputetëve në seancë, ku do të plotësohet edhe kuorumi i domosdoshëm prej 80 deputetësh për zgjedhjen e Presidentit, votimit do ti nënshtrohet kandidati i LDK por dhe ai i LVV, dhe do të numërohen votat në kutitë e votimit!

Pra, duke mos e pranuar as realitetin e zgjedhjes së fundit për President, ku ishte po ky Lumir që i ruajti qeverinë që kishte formuar dhe mundësoi zgjedhjen e Presidentit, në atë rast nga koalicioni i LVV, Vjosa Osmanin, duke luajtur të plotëfuqishmin pa pasur vota për zgjedhjen e Presidentit, tashmë Albin Kurti shkelmoi këtë mundësi që i ofroi Lumir Abdixhiku për ta vazhduar i qetë qeverisjen me një mbështetje shumë të fortë elektorale ku nuk kishte nevojë për asnjë votë deputeti, dhe e çoi Kosovën në zgjedhje të reja, ku numërimi filloi nga mesnata për 45 ditë!

Dhe, jo vetëm kaq!

Nuk dihet se kush ja ka imponuar këtë ide refuzuese për Konsensus, por Albin Kurti duhet ta dijë se Lëvizja Vetëvendosje kurrë më në jetën e saj nuk do ti marrë 51% të votave, dhe shifrat e zgjedhjeve paralamentare në Kosovë janë më kokëforta se filmat që sheh Kurti me “sukseset e Edi Ramës”!

Sot, askush nuk mund ta akuzoj Albin Kurtin se është i korruptuar, dhe, përderisa nuk është i tillë ku do ti merrë paratë ai si Edi Rama për të blerë vota dhe për ta krijuar shumicën me 2/3 e mandateve!

Dhe, kur LVV hyri në garën parlamentare pse Albin Kurti nuk e shikoi rezultatin e votimeve të një parlamenti ku po mendonte të futej, sepse aty do të gjente edhe përgjigjen jo se çfarë do të thotë konsensus, por, çfarë do të thotë, Konsensus i Domosdoshëm!

Në zgjedhjet e vitit 2007, kur dhe filluan angazhimet e para për krijimin e Lëvizjes Vetëvendosje, parti, PDK mori 34% të votave, LDK 21.8% por kishte LDD-në që ishin vota të atyre që u shkëputën nga ky trung dhe morën 12.1%! Krizë për krijimin e institucioneve nuk kishte, madje ishte kjo shumicë qeverisëse që shpalli edhe Pavarësinë e Kosovës me Kryeministër nga PDK dhe President nga LDK!

Çfarë bëri Albin Kurti me Lëvizjen Vetëvendosje në vitin 2010 kur u fut në Parlament, apo edhe sot është i bindur se shpiki demokracinë!

Me pjesëmarrjen e 706.317 votuesve ose 45.29%, ku mund të akuzonte gjithçka që ishte bërë dhe korrupsionin evident, Albin Kurti me LVV-në morën vetëm 12.69% ndërsa PDK mori 32.11% ndërsa LDK 24.69%.

Konsumimi i këtyre partive PDK e LDK, akuzat pa doganë që mund të bënte LVV që ishte dhe shpresa e vetme që shihej te Albin Kurti i sollën fitoren e madhe të 28 dhjetorit 2025 me pjesëmarrjen e 899.517 votuesve ose 44.99% ku LVV mori 51.1% të votave, PDK kishte 20.19% dhe LDK 13.24%; Por, pa u interesuar fare pse vetëm 10 muaj më parë në zgjedhjet që i zhvlerësoj po LVV, kishte marrë 42.3% ndërsa PDK kishte 20.95% dhe LDK 18.27%, ku pjesëmarrja ishte 789.172 votues ose 40.04 %, me një ulje të dukshme nga viti 2021 ku u shënua dhe fitorja historike dhe pjesëmarrja ishte 903.379 votues ose 48.7% dhe Lëvizja Vetëvendosje u rendit e para me 50.28%, Albin Kurti marshoi drejt fundit të Epokës Kurti!

Sot është e qartë se Epoka Kurti i kushtoi qytetarit të Kosovës shumë kohë, energji dhe para, dhe me të mirat dhe të këqijat e kësaj Epoke, lajm i mirë është se Konsensusi po rikthehet në jetën politike në Kosovë, dhe në zgjedhjet e ardhshme ai do të aplikohet jo vetëm për zgjedhjen e Presidentit por edhe të Qeverisë, sepse, LVV edhe mund të dal e para në zgjedhje, por, Albin Kurti vetëm në ëndërr mund ti shoh 51%!

Ashtu siç mund ta shoh vetëm në ëndërr veten e vetë si Kryeministër i Kosovës në Frontin kundër Presidentit Amerikan, aty ku as krijuesi i këtij Fronti, Kryeministri spanjoll Sanchez, nuk do të jetë më!

Ndërkohë qytetarit të Kosovës, deri në zgjedhjet e radhës pas 45 ditëve, i ngelet që të lexoj të kaluarën për të mos u përsëritur gabimet si të Epokës Rugova, Epokës Thaçi, ashtu dhe Epokës Kurti; Që në të treja rastet, paradakosalisht, fundi i Epokave u shkaktua nga vetë krijuesit!