Edhe bankat, instrument diskriminimi i shqiptarëve

nga Shaip Kamberi*

Edhe bankat po bëhen instrument i diskriminimit politik ndaj shqiptarëve në Luginën e Preshevës.

Veprimet e fundit të HalkBank për të refuzuar donacionet e ardhura nga Kosova për Këshillin Kombëtar Shqiptar, pa asnjë transparencë, pa vendim publik dhe pa arsyetim ligjor, përbëjnë një precedent shqetësues dhe të papranueshëm.

Ky nuk është më një veprim teknik apo bankar, por një akt me përmbajtje të qartë politike dhe diskriminuese.

Kur një institucion financiar ndërkombëtar bëhet pjesë e mekanizmave që pengojnë funksionimin e institucioneve legjitime të pakicës shqiptare në Serbi, atëherë kemi të bëjmë me bashkëpjesëmarrje në një politikë sistematike përjashtuese.

Nën ndikimin e strukturave politike në Beograd, dhe konkretisht nën diktatin e ministrave që nuk përfaqësojnë interesin qytetar, por agjenda të ngushta partiake, po krijohet një klimë ku të drejtat elementare të shqiptarëve cenohen në mënyrë të vazhdueshme.

Refuzimi i donacioneve nga Kosova nuk është vetëm një goditje financiare ndaj Këshillit Kombëtar, por një përpjekje për të izoluar institucionalisht shqiptarët e Luginës së Preshevës dhe për të penguar lidhjet e tyre natyrore me Kosovën.

Është gjithashtu një goditje e drejtpërdrejtë ndaj qindra përfituesve shqiptarë, aktiviteti i të cilëve mbështetet nga këto mjete.

Ndër kategoritë më të prekura janë nxënësit, studentët, mediat, shoqëria civile, bujqit, si dhe organizatat që punojnë me fëmijët me nevoja të veçanta.

Për këto bllokime financiare janë të informuar edhe mekanizmat ndërkombëtarë. Mjerisht, e gjithë kjo po ndodh pa asnjë pasojë për politikën dhe shtetin që zbaton këto praktika diskriminuese.

Heshtja përballë kësaj padrejtësie nuk është neutralitet; ajo shndërrohet në bashkëfajësi dhe i jep hapësirë vazhdimit të diskriminimit.

Të drejtat e pakicave janë themeli i arkitekturës së Bashkimit Evropian, ndërsa Evropa hesht kur shkelen parimet e saj themelore.

Pse heshtin BE, OSBE, KE dhe ambasadat perëndimore?

Dhe, mbi të gjitha, pse hesht ambasada turke duke lejuar që një institucion financiar i lidhur me të bëhet pjesë e një mekanizmi diskriminues ndaj pakicës shqiptare?

Prandaj nevojitet urgjentisht:

• Transparencë e plotë nga HalkBank për këtë vendim;

• Sqarim institucional mbi bazën ligjore të refuzimit;

• Ndërprerja e menjëhershme e kësaj praktike diskriminuese ndaj institucioneve shqiptare.

Në të kundërtën, kjo çështje jo vetëm që do të ngrihet në nivele ndërkombëtare si dëshmi e qartë e diskriminimit sistematik dhe shkeljes së të drejtave kolektive të shqiptarëve në Serbi, por e drejta do të kërkohet edhe para institucioneve gjyqësore.

*deputet në Parlamentin e Serbisë