Vjosa Osmani kandidate e LDK për Presidente të Kosovës, Albin Kurti kandidat i LVV për Kryeministër

Këshilli i Përgjithshëm i Lidhjes Demokratike e Kosovës, LDK, ka zyrtarizuar marrëveshjen për garë të përbashkët në zgjedhjet e parakohshme parlamentare të 7 qershorit me Ish-Presidenten Vjosa Osmani, e cila përveç se bartëse list do të jetë edhe kandidate për Presidente e LDK, ndërsa Këshilli i Përgjithshëm i Lëvizjes Vetëvendosje, LVV, sërish ka nominuar Albin Kurtin si kandidat për Kryeministër.

Pas nominimit, Albin Kurtin, kryetari i Lëvizjes Vetëvendosje, Albin Kurti, tha se synimin për rritjen më të madhe të partisë në zgjedhjet e ardhshme është deri në 60 për qind.

“Shkurt-Dhjetor u rritëm prej 10 për qind, nëse rritemi kaq deri në qershor, do të mund t’i prekim edhe 60 për qind. Nëse punojmë ashtu siç dimë, me sinqeritet, kjo është e mundur. Sa herë po na bllokojnë, ne po rritemi e ata po marrin përgjigje nga populli,” tha Albin Kurti ndërsa kritikoi qasjen e opozitës duke e akuzuar për bllokimet institucionale.

“Në s’kishim nevojë për zgjedhje të reja kaq shpejt. Mbase dikush, ndonjë strateg që drejton nga hija veprimet opozitare, po mendon që zgjedhjet janë të domosdoshme. Ndoshta janë për dikë, por jo për popullin e shtetin. Kjo po ndodh sepse kemi një opozitë e cila ka kuptuar se nuk mund ta mund popullin, por ka zgjedhur ta bllokojë shtetin. Vullnet i popullit nuk është nen kushtetues, është forcë e historisë që na shpie përpara,” tha Kurti ndërsa orientimin e Kosovës drejt Evropës e cilësoi si vlerë të brendshme të shoqërisë dhe shtetit.

“Evropa për Kosovën nuk është stacion i thjeshtë, por vlerë që e mbajmë brenda nesh”, deklaroi Kurti, duke shtuar se Qeveria po ndërton institucione të bazuara në drejtësi, dinjitet dhe luftë kundër krimit e korrupsionit.” 

Duke folur për përgjegjësinë politike dhe mbështetjen qytetare, kandidati i Lëvizjes Vetëvendosje për Kryeministër theksoi vendosmërinë për të vazhduar rrugën politike të partisë.

“Është nder dhe përgjegjësi e madhe. Është detyrim historik ky që kam ndaj jush. Është detyrim që e kemi ndaj kombit shqiptar dhe Republikës sonë. Këtë detyrë do ta përmbushim e s’do të na ndalë askush. Sytë i kemi te përparimi i kombit tonë. Pa mbështetjen e juaj masive, nuk do të mundeshim të kapërcenim vështirësitë shoqërore e historike që na janë paraqitur në të kaluarën.

Me mbështetjen tuaj, do ta kalojmë çdo pengesë, përfshirë edhe këto sfida absurde që po na paraqiten tash. Jemi në një tjetër fushatë, në një tjetër ballafaqim me të kaluarën, që nuk do të vdesë kurrë pa u përpjekur edhe një herë të na e marrë frymë,” tha kandidati për Kryeministër Albin Kurti para Këshillit të Përgjithshëm të Lëvizjes Vetëvendosje duke përfunduar:

“Jemi këtu të pathyer, me duar të pastra e ballëhapur!”

Ndërsa Kryetari i Lidhjes Demokratike të Kosovës, Lumir Abdixhiku, para Këshillit të Përgjithshëm propozi që në zgjedhjet e 7 qershorit lista e LDK-së të kryesohet nga Vjosa Osmani si kandidate për Presidente të Republikës, ndërsa ai vetë do të jetë kandidat për Kryeministër si numri 2 në listë.

“Në takimin e përbashkët të Kryesisë qendrore dhe kryetarëve të degëve të LDK, kam shtruar para tyre propozimin tim për një listë bashkuese. Një listë që nuk ndërtohet mbi rehati politike, por mbi përgjegjësi shtetërore. Në këtë listë kam propozuar garim të përbashkët për President të Republikës dhe Kryeministër të Republikës. Kam propozuar që LDK të garojë me presidenten Vjosa Osmani si kandidate për presidente të Republikës dhe njëkohësisht bartëse të listës dhe me mua si kandidat të LDK për kryeministër të Republikës. Këtë propozim po e shtroj edhe para jush për miratim përfundimtar,” tha Lumir Abdixhiku para Këshillit të Përgjithshëm të LDK-së duke theksuar nevojën për bashkim të plotë brenda partisë, ndërsa e cilësoi unitetin si kusht për forcimin e LDK-së dhe përballimin e sfidave politike në vend.

“Ky bashkim nuk është vetëm përgjigje ndaj një pale politike. Ky bashkim është antidot ndaj gjendjes në të cilën ka rrëshqitur Kosova. Kosova sot ka nevojë ta rikthejë fuqinë e saj në politikën e jashtme. Ka nevojë ta rikthejë besimin me aleatët strategjikë. Ka nevojë për një gjuhë serioze shtetërore, për një përfaqësim dinjitoz dhe për një orientim të qartë euroatlantik,” tha Abdixhiku duke theksuar nevojën për tejkalim të ndasive brenda partisë.

“Askush nuk e ka luksin e inatit personal. Askush nuk e ka luksin e hatërmbetjeve. Askush nuk ka të drejtë të vendosë veten mbi nevojën që ka Republika për një LDK të fortë, të bashkuar dhe të gatshme për betejat që na vijnë. Dhe po e them sot para jush me bindje të plotë se ky proces nuk ka qenë proces as për poste, as për interesa vetanake. Nuk ka qenë proces për pazare politike, nuk ka qenë proces për ndonjë fotografi elektorale; ka qenë proces ndërgjegjësimi. Proces ku secili prej nesh është dashur të bëjë një pyetje të vetme: Çfarë është më e rëndësishme sot? E kaluara jonë personale apo e ardhmja e Republikës së Kosovës?”, tha Kryetari i LDK-së, Lumir Abdixhiku duke përfunduar:

“Unë jam krenar që, pavarësisht dallimeve, pavarësisht rrugëve që kemi kaluar, pavarësisht plagëve që politika ndonjëherë i lë pas vetes, njerëzit e LDK-së kanë ditur të kuptojnë rëndësinë dhe peshën e momentit. Kanë ditur të kuptojnë se kjo nuk është kohë për ndarje. Kjo nuk është kohë për ego. Kjo nuk është kohë për mure brenda shtëpisë sonë politike. Kjo është kohë vetëm për një gjë: për bashkimin e madh të Lidhjes Demokratike.”