Kurti: Kosova është e gatshme të jetë aleate industriale e Gjermanisë
Duke vlerësuar marrëdhëniet mes Kosovës dhe Gjermanisë, Kryeministri në detyrë i Kosovës, Albin Kurti, në konferencën ndërkombëtare “Future Industry Minds 2026” e cila po zhvillohet në Këln, theksoi potencialin ekonomik dhe mundësitë e reja të bashkëpunimit në industri, energji, teknologji dhe inovacion.
“Kosova po shndërrohet në një vend tërheqës për investime falë popullsisë së re, fuqisë punëtore të kualifikuar dhe zhvillimit të sektorit digjital,” tha Albin Kurti duke shtuar se lidhjet e forta me Gjermaninë dhe diaspora kosovare përbëjnë një urë të rëndësishme bashkëpunimi mes dy vendeve.
Pjesëmarrja e mbi dhjetë kompanive kosovare në këtë konferencë, tha Kurti është dëshmi e kapaciteteve të tyre në fusha si IT, prodhimi, logjistika dhe shërbimet profesionale, duke e cilësuar këtë si një hap të rëndësishëm për promovimin ndërkombëtar të ekonomisë së Kosovës.
Ai iu referua edhe historisë së marrëdhënieve mes dy vendeve, duke kujtuar pritjen e refugjatëve kosovarë nga Gjermania gjatë viteve 1998–1999 dhe praninë afatgjatë të trupave gjermane në kuadër të KFOR-it.
“Këto nuk janë fusnota në historinë tonë dypalëshe, por themele mbi të cilat ndërtohet besimi ynë strategjik,” tha Kryeministri në detyrë duke nënvizuar se Gjermania ka qenë ndër vendet e para që ka njohur pavarësinë e Kosovës.
Në fjalën e tij, Albin Kurti foli edhe për rolin e diasporës kosovare në Gjermani, të cilën e cilësoi si urë të gjallë mes dy shoqërive, ndërsa theksojn kontributin e mijëra profesionistëve kosovarë në transferimin e njohurive dhe standardeve evropiane në Kosovë.
Ndryshe, në konferencën ndërkombëtare “Future Industry Minds 2026” ku Kosova merr pjesë për herë të parë si vend partner ndërsa marrin pjesë liderë të industrisë gjermane, përfaqësues të kompanive evropiane, ekspertë të teknologjisë si dhe investitorë nga vende të ndryshme, Kryeministri në detyre, Albin Kurti, është i shoqëruar nga ministrja në detyrë e Indsutrisë, Mimoza Kusari Lila, dhe, kompani të shumta.
