Edi Rama është mirë, kur s’është mirë Shqipëria!
nga Agim Popoci
Askush nuk do ta mendonte se një piktor nga radhët e kokave komuniste shqiptare, pasi bredhi botën për bukën e gojës, vodhi edhe ikona për këtë hall, siç tha Kryetari i partisë së tij Fatos Nano, erdhi në kulmin e krizës në Shqipëri për t’u bërë legjendë; Ngjashëm me personazhin e romaneve të aventurave fiktive, dentistin, kumarxhiun dhe pushkatarin, Doc Holiday, i cili pasi bredhi në Perëndimin e Egër për t’i shpëtuar vdekjes, erdhi në heshtje dhe u bë legjendë, dhe, vdiq në këmbë!
Por, për fatin e keq të shqiptarëve, në Shqipëri asgjë nuk ka lidhje me fiktiven e William Mark, sepse Edi Rama erdhi në kulmin e krizës dhe filloj të sundoj, dhe, gjithmonë mori pushtetin kur kishte krizë ose krijoi krizën për të ardhur në pushtet, ndërsa kur iu luhat pushteti, sikurse dje, filloi edhe të krijoi krizë për të mos e dorëzuar pushtetin! Ky është dhe alarmi real për për të ardhmen e kombit dhe shtetit shqiptar, sepse Edi Rama për karrierën e tij, kur ju desh e bëri edhe Perëndim të Egër, e sa për tu bërë dentist, kumarxhi ose pushkatar, këtë nuk e ka problem sepse drejton një Parti kriminale e cila u krijua dhe frymon nga krimi!
Ndoshta për momentin dikush e ka menduar kur pa Edi Ramën që erdhi në krye të Bashkisë Tiranë, se erdhi njeriu i duhur civil që ta drejtoi kryeqytetin shqiptar!
Por, shumë shpejtë, pasi filloi të largoi oficerët e Sigurimit të Shtetit nga Parku Rinia ku kishin pushtuar tokën e Tiranës për të ndërtuar restorante, Edi Rama konstatoi entuziazëm por jo dhe votë në sondazhet që filloi ti kryen për zgjedhjet e radhës, situatë e ngjashme si në Ministrinë e Kulturës kur të gjithë e pëlqyen ministrin bojaxhi por jo dhe shkatërruesin e Teatrit Kombëtar, që shumë shpejtë e nxori kokën duke kërcënuar me shembje të Teatrit dhe fyerje ndaj artistëve që e kundërshtuan idenë e tij!
Kur mandati i kryebashkiakut po konsumohej dhe piktori modern nuk kishte më kuptim ai iu kthye politikës së Partisë së tij të shpirtit, duke u marrë me kundërshtarin politik dhe duke shkaktuar kriza, ashtu siç u ngrit nëna e tij Parti, ose u rikthye në pushtet në vitin e zi 1997!
Ballistët me pulat e tyre të dalur nga goja e Edi Ramës mund të konsideroheshin batuta nga njerëzit që po shikonin se si po zhdukeshin kioskat nga bregu i Lanës dhe nuk e vrisnin mendje se kishte filluar të betonohej Blloku me shumëkatëshe pakuptim duke e konsideruar zhvillim, por, kryetari i tyre i bashkisë vinte nga një parti kriminale, ashtu siç konfirmojnë dhe Buletinet e Zërit të Popullit nga vitet 1942-1944, se për mbi 1.000 ditë luftë, ata zhvilluan vetëm 23 beteja kundër fashistëve italianë dhe gjermanë, dhe gjithë pjesën tjetër të luftës ia kushtuan betejave dhe eliminimit të ballistëve, në emër të zhvillimit të shtetit shqiptar!
Dhe, jo vetëm kaq!
Përbuzja dhe akuzat ndaj shqiptarëve të Veriut të Shqipërisë nuk është shpikje e Edi Ramës sado që i urren të gjithë ata që jetojnë mbi Fushë Krujë, ai është rritur në një klimë të tillë familjare ku Muti dhe Maloku nuk kishin ndonjë dallim, e sa për përdhosjen e këtyre shqiptarëve fisnikë kjo Partia u kujtua edhe 2 vjet para se të vinte në jetë Sali Berisha dhe 55 vjet para se të sajonin përralla me Veriorë që do ti dërgoj Saliu në Jug për të vrarë shqiptarë në vitin e zi 1997!
Në komunikatën e Zërit Popullit të Tetorit të vitit 1942 në Gjirokastër raportohet “për elementë nga krahinat e Shqipërisë së Veriut të mashtruar nga bajraktarë e krerët reaksionar, që u përdorën nga Prefekti Tahir Kolgjini për të asgjësuar Lëvizjen Antifashiste Nacionalçlirimtare në ish-qarkun e Gjirokastrës.”
Përveç ngjashmërisë së frikshme të tekstit me broçkullat që u shkruan nga dora e zezë te “Koja Jonë” edhe 55 vjet më vonë, Zëri i Popullit u kujdes të përbaltë në vitin 1942 njërin ndër figurat më të nderuara të kombit shqiptar, Tahir Kolgjinin, në atë kohë Prefekti i Gjirokastrës, duke i rezervuar po në këtë komunikatë togfjalëshin “pasi na solli gegët këtu për ta përçarë Shqipërinë edhe një herë në gegë e toskë”, që do të bëhet abc-ja e politikës komuniste shqiptare kundër rivalëve politikë deri në ditët e errëta që po jetojmë.
Shumë patriotë shqiptarë janë tronditur me kryengritjen komuniste të vitit 1997 dhe zellin që tregoi Edi Rama për ta përsëritur në 21 Janarin e vitit 2011, por, nxitja, urrejtja dhe fjalori që përdorin Korbat e Ramës e gjejnë përgjigjen në Buletinet e Zërit të Popullit nga vitet 1942-1944, propagandë kjo komuniste edhe me vrasjen e mijëra “ballistëve të pasur” sepse nuk e duan Shqipërinë e lirë, për të cilën luftonin “partizanët e varfër”, luftë që vazhdon edhe sot, ndërsa arsyet ekonomike ose vjedhjet e parave shqiptare bien si arsye me zbulimin e skandaleve të fundit të përmasave të koncesioneve si me Dializën, Sterilizimin, Thuman-Kashar, Inceneratorët, Investitorët Strategjik si dhe vjedhja e të gjitha vjedhjeve, AKSHI, që nuk e imagjinon dot as inteligjenca e hajdutes Diella!
Sot Edi Rama sikur të kishte mundësi të kthehej në kohë ndoshta do t’ia ndalonte zarit të tij Lame të publikoj zbulimin e madh me një dokument ordiner që konfirmonte, sipas tij, se më në fund u zbulua sasia e saktë se sa kishte marrë Mbreti Zog kur u largua nga Shqipëria në vitin 1939, 11 valixhe me afro 178 kg flori, sepse edhe me çmimin e sotëm që është dhe kulmi historik kap vlerën prej 23 milionë euro, shumë kjo që sot Kryeminisrit të Belës dhe Gysit nuk i del as për një vit, vetëm për verë dhe shëtitje me avionë!
Por, sot, është e qartë se Edi Rama është mirë, kur s’është mirë Shqipëria! Ashtu siç ishte në vitin 2017 kur të gjitha sondazhet tregonin se fitues është PD, dhe, Edi Rama nuk e dëshironte garën zgjedhore por manipuloi zgjedhjet dhe bleu votat, ashtu si në vitin 2021 kur po e shikonte humbjen me sy dhe shkelmoi Kodin Zgjedhor, ashtu dhe në vitin 2025 kur krimi kishte marrë dhen, dhe, ky me kriminelët komunistë të Kuçit po shpallte fituesin ende pa filluar beteja, në zonën ku Buletinet e Zërit Popullit edhe 85 vjet më parë raportonin për pusitë e 2000 ballistëve ku 100 ushtarë dolën fitues me asnjë të vrarë përballë qindra viktimave nga radhët e ballistëve!
Por, fatkeqësisht 11 Maji 2025 nuk është fundi! Kjo u pa dje kur sapo kishte marrë ca sinjale për disa kundërshti të Brukselit për integrimin e Shqipërisë në BE, Edi Rama filloi të sulmoi opozitën duke e fajësuar për bllokimin e këtij procesi, ndërsa ndryshimet e kërkuara nga pala evropiane si për Ligjin për Portet Tursitike ashtu dhe Investitorët Strategjikë, që ishin dhe vërejtje të opozitës shumë kohë më parë, ai i relativizoi duke thënë se bëhet fjalë për ndryshime teknike dhe jo thelbësore!
Pra, kur pushtuan italianët dhe gjermanët Shqipërinë, partia e Edi Ramës tha se fajet i kanë ballistët dhe i vranë duke i dërguar në internim familjet e tyre! Kur oficerët e Sigurimit të Shtetit ngritën firmat piramidale dhe vodhën paratë e shqiptarëve, tha se fajet i ka Saliu dhe i vunë flakën Shqipërisë! Kur paratë i vodhi Likja sërish fajet i kishte Saliu dhe i vunë flakën Tiranës!
Por, kur Edi Rama bllokoi Këshillin Bashkiak të Fierit dhe Bashkimi Evropian e bëri të qartë se vetëm me këtë zhbllokim shteti shqiptar mund të merret statuti i vendit kandidat për BE, njeriu që erdhi në kulmin e krizës në Shqipëri dhe u bë legjendë duke mos pranuar asnjë kompromis, ishte i qartë, ai nuk do betejë elektorale – ai do pushtet! Dhe, këtë, shqiptarët për fat të keq, nuk e kuptuan!
Nuk e kuptuan, ndonëse shumë kohë më parë e kishte thënë qartë legjenda e ushtrisë amerikane, Gjenerali George Patton:
Beteja është gara më madhështore që njeriu mund të shijojë. Ajo nxjerr në pah gjithçka që është më e mira, largon gjithçka që është e ulët!
