Ringjallja e politikave të Pashiçit në Shqipërinë e Edi Ramës!

nga Prof.Dr.Enver Bytyçi
Eksperti serb Dimitrije Shujeranoviç, do të menaxhojë pranë Këshillit të Lartë të Drejtësisë stokun gjigand të dosjeve të prapambetura të shqyrtimit të çeshtjeve penale e civile në Shqipëri. Ky është lajmi më i ri i kohës. Pra, ne shqiptarët do të duhet të mësohemi me faktin se serbët do të kujdesen për ne. E ndërkohë ky fakt nuk është as i vetmi dhe as i pari. Prej vitit 2014, kur kryeministri i Shqipërisë, Edi Rama, vizitoi për herë të parë Beogradin, ne e dimë se prania serbe në Shqipëri është dhjetëfishuar. Sidomos në investime dhe në ekonomi, deri te sektorë strategjikë siç është energjitika.
Të jesh biznesmen i Serbisë do të thotë të jesh me fat, se në Shqipëri është krijuar rrjeti i këshillimeve dhe ndihmës për këta biznesmenë, rrjet të cilin e drejton kryeministri Rama përmes dy të maskuarve si gazetarë, Baton Haxhiut dhe Blendi Fevziut, nëse i referohemi një deklarate për këtë të gazetarit, Milaim Zeka. Sidomos pas ardhjes së Albin Kurtit në krye të qeverisë së Kosovës në vitin 2020 trendi i rritjes së pranisë serbe në të gjithë sektorët e ekonomisë, politikës, shërbimeve, transportit, energjitikës e deri te drejtësia në vendin tonë është i dukshëm.

Bashkë me kompanitë serbe, tek ne vijnë ekspertë të Serbisë, shpesh herë të maskuar si të tillë, sepse në fakt ata paguhen edhe nga BIA e Beogradit. Me ardhjen e Kurtit u trasferua dhe qendra e gravitetit për njerëzit e Beogradit në Kosovë. Ata erdhën në Tiranë.

Pararendës i të gjithë këtyre subjekteve serbe ishte stacionimi në Tiranë i Baton Haxhiut. Edhe Shkëlzen Maliqi, i cili konsiderohet me një pasuri prej 500 milion eurosh, ishte në fillim në kryeqytetin shqiptar. Të dy erdhën si këshilltarë të Edi Ramës. Por për çfarë do ta këshillonin ata kryeministrin e Shqipërisë?

Thjesht për të vendosur lidhjet me politikën, ekspertizën, biznesin dhe superstrukturën shtetërore serbe. Për asgjë tjetër nuk i duheshin këta të dy zotit Rama. Shkëlzen Maliqi nuk ndenji shumë. Baton Haxhiu bën sikur nuk pajtohet në disa gjëra me Edi Ramën, por e gjitha duket si një lojë. Ramës i intereson që në publik të duket i distancuar prej Haxhiut, sepse miqësia me të ka kosto. Megjithatë Batoni është mjeshtri i lidhjeve të kryemninistrit shqiptar me Serbinë e me një pjesë të mirë të politikës në Kosovë.

Gjithçka që ndodh në lidhjet e Tiranës me Beogradin zyrtar ka si këshilltar dhe si dorzan Baton Haxhiun. Po ashtu gjithçka që ndodh në përçarjen e politikës në Kosovë ka gjithashtu ndërmjetës me Edi Ramën, të ashquajturin analist, Baton Haxhiu.

Edhe thirrja e “ekspertit” Dimitrije Shujeranoviç për të menaxhuar stokun e dosjeve në gjykatat shqiptare është këshillë dhe ndërmjetësim i tij. E gjithë kjo qasje ka dy objektiva. Njëri është politik dhe tjetri është praktik. Objektivi politik lidhet me dëshmimin e parashikimit të Nikola Pashiçit, i cili në letrat e tij të vitit 1913, që ia dërgonte carit rus, Nikolla II, shkruante se “Shqiptarët nuk janë të aftë të vetëqeverisen, ndaj u duhet që edhe për 100 vjet të vihen nën patronazhin e Serbisë”!

Nuk ka asnjë pikësynim tjetër politik fakti që Rama dhe opozita e Kosovës i janë nënshtruar skemave dhe projekteve serbe në Shqipëri dhe në Kosovë. Qëllimi është të provohet hipteza serbe se “Shqiptarët nuk janë të aftë të merren vesh me njëri-tjetrin e për pasojë nuk munden të vetëqeverisen”!

Këtë mesazh na jep prania e Shujeranoviçit në sistemin gjyqësor të Shqipërisë si ekspert. “Ju jeni të paaftë! Ju duhet një serb që t’u ndihëmojë me ekspertizë, me qëllim që të aftësoheni”!

Këtë mesazh na e jep edhe sjellja e opozitës në Kosovë dhe bojkoti i saj për formimin e institucioneve të shtetit.
Kjo prani e ekspertit serb në Shqipëri duket simbolike. Por simbolika është kryekëput anti-shqiptare.

Më mirë do të ishte që këtë stok ta menaxhonte Dalina Fico, sesa një ekspert i Serbisë, edhe pse Fico mund të jetë me sentiment pro-Serbisë.

Ndërkohë gjithkush e di se në Shqipëri ka juristë të aftë e të përgatitur që mund t’i japin zgjidhje edhe problemit të stoqeve në gjykimin e çeshtjeve gjyqësore. Kishte mundësi gjithashtu të merreshin ekspertë nga vende të Bashkimit Europian. Por jo! Duhej që këtë ekspertizë ta kryente një jurist i Serbisë.

Kjo dëshmon se midis Tiranës zyrtare dhe Beogradit ka një marrëdhënie jo vetëm të ndërmjetësuar nga Baton Haxhiu, por edhe të diktuar nga lidershipi serb. Kjo dëshmon njëkohësisht se Open Balkan në raportet Serbi-Shqipëri është funksional, vazhdon të diktojë politikat e marrëdhënieve midis të dy vendeve.

Kjo do të thotë se edhe në të ardhmen do të vazhdojë politika e përçarjes në Kosovë. Derisa “të eleminohet” Albin Kurti, eleminim të cilin Baton Haxhiu e kërkoi publikisht!