Duke pritur zgjedhjet që çlirojnë nga skllavëria serbe!

nga Agim Popoci

Në prag të zgjedhjeve të treta parlamentare në Kosovë brenda 15 muajve, askush nuk u shqetësua nga raporti i fundit i platformës World Atlas ku Kosova, bazuar në të dhënat e Fondit Monetar Ndërkombëtar për vitin 2025 renditet si vendi i dytë më i varfër në Europë, pas Moldavisë, madje nuk kas xhelozi pse nuk jemi të parët; Por, vazhduan akuzat dhe kundër akuzat pas përplasjes në Skenderaj se kush është tradhtar, “Sami Serbia” apo “Albin Serbia”, si dhe pas largimit të ish-presidentes Vjosa Osmani nga koalicioni qeverisës tashmë si kundërshtare e Albin Kurtit!

Në krye të herës duhet thënë se këto përplasje dhe këto akuza të pakuptimta nuk do të ndodhnin kundër Sami Lushtakut dhe gjithë komandantëve të tjerë nëse nuk do të merreshin me politikë, ashtu siç bëri gjenerali i njohur kroat Ante Gotovina, pas kthimit nga Gjykata e Hagës ku u akuzua për kirme lufte, që refuzoi të merret me politikë dhe sot është një sipërmarrës i suksesshëm dhe jo pak i pasur ama shumë i nderuar!

Por, tani jemi në një realitet  ndryshe, në mungesë të një partie të djathtë dhe një lidershipi si Franjo Tugjmani, duke parë se si Kosova vazhdon të tërhiqet zvarrë nën skllavërinë serbe pa mundësinë e çlirimit, fatkeqësisht, edhe tani si shtet që ka kaluar moshën e adoleshencës, 18 vjeç, terren vazhdojnë dhe gjejnë edhe partitë e ekstremit të majtë dhe populistët e neveritshëm!

Pikërisht në këtë klimë u shfaq Lëvizja Vetëvendosje si mjeshtër i propagandës dhe komunikimit masiv me në krye liderin e saj Albin Kurti, jo me një ofertë siç kishte bërë Partia Demokratike e Kosovës me në krye Hashim Thaçin, me një fushate model me qeverinë hije, por me akuza për shumë vite kundër lidershipit të PDK-së që kulmoi me ardhjen në pushtet pas skandalit “Pronto”!

Ardhja ishte madhështore por jo pushtetërimi sepse nuk pa njeri ndonjë arrestim të bujshëm pasi Albini u ul në fron ndërsa gjithçka që u tha për partinë PDK dhe lidershipin e saj mbeti vetëm një dramë të cilën e kaloi populli i varfër i Kosovës duke dëgjuar përgjime të agjencive të huaja, që i lanë pa gjumë!

Ndoshta nga propaganda e shumtë laboratori i Lëvizjes Vetëvendosje nuk i ka logjikuar dhe aq shumë gjithë ato parulla që nxjerr në qarkullim në rrjetet sociale, por të kërkosh votën nga populli duke akuzuar Sami Lushtakun me shok për vjedhje, dhe me ardhjen në pushtet, në mungesë të kësaj padie në organet e drejtësisë të fillosh me akuzën e re për tradhti kombëtare, kjo mbanë erë!

Nëse Zv/Ministri Hysni Mehani ka folur për vite me radhë për Sami Lushtakun, aktualisht kryetar i komunës Skenderaj, që vjedhë, pse në ligjërimin e tij ai dhe Vetëvendosja nuk e përdorin parullën “Sami Hajni” apo kjo nuk sjellë vota dhe duhet ta përziejnë pak me skllavëri, e pak si shumë me tradhti që akuza të godet në masën popullore e cila nuk po çlirohet dot nga skllavëria serbe, “Sami Serbia”!

Akuza ndezi por ndodhi edhe gjëma, Samiu nuk mbajti më nga akuza “Sami Serbia” dhe goditi Hysniun, dhe për t’u dëshmuar se klima është e kontaminuar në përmasa alarmante komuniste, u pa ekzaltimi i elektoratit të Lëvizjes Vetëvendosje pas dërgimit të Njësisë Speciale të Policisë kur ndodhi përplasja! E për qershinë mbi këtë gjëmë u kujdes vetë Albin Kurti duke deklaruar se ishte dakord me këtë ndërhyrje, madje policia ishte e vonuar; Ndonëse fliste pikërisht për atë vend ku elektorati i Samiut ndryshe nga ai Albinit që rrinë dhe akuzon në rrjetet sociale, është rritur me edukatën se nuk duhet të lejojnë që ti lidhë as Krajli e as Mbreti, madje as Kadri Mehmeti!

Për elektoratin e Lëvizjes Vetëvendosje që përgjithësisht është moshë shumë e re, i cili edhe sot nuk e dinë se si u çlirua Kosova por preket nga “tradhtarët”, që nga krijimi i kësaj partie ka pas ushqim i cili prodhoi vetëm votë, pa pasur pikë emocioni për të gjithë ata që ishin në vijën e frontit duke përfshirë këtu edhe njërin prej komandantëve të UÇK-së, Sami Lushtakun!

Duke u futur në këtë vorbull propagande antishqiptare, elektorati i kësaj partie e pranoi Rexhepin që e do Albinin por jo Samiun që e do Hashimin, dhe pa e pastruar vetëdijen se një njeri i cili ka qëndruar qoftë edhe një orë në front kundër serbit duhet të respektohet, çdo mbështetës i Albinit krijoi në kokën e tij vetëm dy lloj shqiptarësh, “Me Albinin” dhe “Të Serbisë”; Dhe, pa pyetur veten pse këta “Të Serbisë” nuk arrestohen dhe vazhdojnë e pasurohen si në kohën e Hashimit, në veçanti i shumëpërfoluri Shkëlqim Devolli i cili edhe sot gëzon privilegjet serbe si  në Prishtinë ashtu dhe në Tiranë!

Në këtë klimë, po futen fatkeqësisht edhe zgjedhjet e 7 Qershorit, që duhet pranuar se pavarësisht rezultatit dhe fituesit nuk do ti sjellin asgjë të re Kosovës, e aq më pak Skenderajt dhe Drenicës!

Për ata që nuk duan t’ia dinë se si duhet të vepronte ndryshe Albin Kurti, sërish duhet marrë shembullin e Kroacisë i cili përveç se tregon se si duhet të trajtohen çlirimtarët, tregon dhe faktin se të majtët gjithmonë janë të dhunshëm kur janë në pushtet, dhe, përdorin pa hezitim policinë!

Më 28 dhe 29 maj të vitit 2015, Qeveria e socialidemokratit Zoran Milanoviç që sot është President, urdhëroi policinë të shpërndaj protestën e çlirimtarëve meqë kishin kaluar orën e lejuar, 22:00 h, në Sheshin e Shën Markut. Policia përdori dhunë, veteranët e luftës u barrikaduan në kishën e afërt. Pastrimi i Sheshit, heqja e tavolinave dhe çadrave dhe konfrontimi fizik nuk zgjidhi gjë vetëm sa tensionoi situatën dhe policia i dha leje vetes të futet edhe në Kishë, ku filluan arrestimet masive ndërsa priftërinjtë u dolën në ndihmë çlirimtarëve; Shtimi i forcave policore pasoi me ardhjen e veteranëve nga e gjithë Kroacia dhe thyerjen e kordonit policor që përfundoi vetëm me negociata!

Një dramë e ngjashme nuk u përsëritë më kurrë në Kroaci, kishte dhe tubime tjera masive të çlirimtarëve pasi Milanoviç humbi zgjedhjet po atë vit, por, nuk ngriti dorë njeri mbi ata që çliruan atdheun!

Mbështetësit e Albin Kurtit padyshim se do të vazhdojnë po me këtë nivel urrejtjeje ndaj të gjithë atyre që ju dalin para në rrjetet sociale duke pritur jetësimin e ëndrrës së radhës që ju rrëfej lideri me fitoren prej 60% edhe pse as 51% i 28 dhjetorit nuk do të përsëritet më kurrë, kjo është e qartë edhe pas ngjarjes në Skenderaj, dhe nuk ka njeri iluzion se do të ketë ndonjë tentativë çlirimi nga skllavëria serbe me këtë kastë politike!

Por, qytetarët tjerë të Kosovës, me Lumir, Vjosë e Bedri së bashku në pritje të zgjedhjeve të radhës që do t’i çlirojnë nga skllavëria serbe, është e sigurt se do të jetojnë më mirë dhe jo si sot në vendin më të varfër në Evropë që drejtohet nga një qeveri e paaftë, por, nuk duhet të jetojnë as me iluzionin se nuk do të shohin më se si vjedhin njerëzit tanë sepse kështu ndodhi edhe me këtë qeveri që erdhi me bajrakun e antikorrupsionit dhe ngeli vetëm me një Kryeministër absolutisht të pakorruptuar, Albin Kurtin.  

Qartë dhe shkurt, e ka thënë patrioti i madh kroat, i përndjekuri politik i cili gjithë qenien e tij ia kushtoi krijimit të shtetit kroat dhe në fund e vrau UDB-ja në një pritë në rrugët e Parisit, Bruno Bushiç:

“Kur të çlirohemi nga skllavëria serbe dhe të krijojmë një shtet, do të shihni se si vjedhin njerëzit tanë. Të gjithë kanë vjedhur e vjedhur prej nesh për shekuj me radhë, dhe gjëja më e vështirë dhe më e keqe do të jetë kur njerëzit tanë të na vjedhin dhe të na shesin te mashtruesit dhe tutorët e botës.”