Kryeministri Rama: Po verifikohet transaksioni për tokën në Zvërnec, SPAK hetim origjinës së fondeve

Ndërsa prej tre ditësh në vend vijojnë protestat ne kryeqytet pas ngjarjeve të dhunës në Zvërnec, ku qytetarë dhe ambientalistë kundërshtuan zhvillimin e projektit turistik në zonën Pishë Poro – Nartë, kryeministri Edi Rama sqaroi sot se ka nisur një proces verifikimi të transaksionit për blerjen e tokës në Zvërnec, që lidhet me sqarimin e origjinës së fondeve të përdorura përmes bankës dhe me çlirimin përfundimtar të investitorëve që janë edhe pronarë.

Deklarata e kryeministrit Edi Rama u bë pas përfundimit të mbledhjes së qeverisë, ku ndër të tjera ai vlerësoi pozitivisht vendimin e SPAK për të mbajtur të ngrira fondet pa i kaluar te shitësi, për të cilin ka pasur një proces hetimor. Sipas tij, kjo është e rëndësishme edhe për çdo pretendim mbi tokën në atë territor, pasi çështja e origjinës së pronës po trajtohet përmes një hetimi të pavarur dhe profesional.

Kryeministri Edi Rama shtoi se në të dy rastet rezultati do të jetë i padiskutueshëm nga pikëpamja ligjore dhe do t’i japë fund çdo spekulimi, manipulimi apo pretendimi të pabazuar në ligj.

“Unë kam dalë për një arsye tjetër që nuk ka të bëjë me mbledhjen e qeverisë, por ka të bëjë me një zhvillim që unë e konsideroj shumë pozitiv lidhur me procesin e verifikimit të transaksionit për blerjen e tokës në Zvërnec, që do të thotë me sqarimin e plotë dhe përfundimtar të origjinës së fondeve të kaluara përmes bankës dhe me çlirimin përfundimtar të investitorëve që tanimë janë dhe pronarë.

Ndërkohë që nga ana tjetër unë e konsideroj po ashtu shumë pozitive që SPAK-u ka vendosur të mbajë të ngrira fondet pa i lënë të kalojnë tek shitësi për të cilin ka një proces hetimor.

Kjo në këndvështrimin tim është shumë pozitive edhe për këdo që pretendon pronë në atë territor, sepse tanimë çështja e origjinës së pronës është një çështje që do të mbulohet nga një hetim tërësisht i pavarur dhe profesional përmes SPAK-ut dhe në të dyja rastet rezultati do të jetë një rezultat i padiskutueshëm nga pikëpamja ligjore, ndërsa nga pikëpamja e pretendimeve do t’i japë fund çdo spekulimi, çdo manipulimi, çdo pretendimi që nuk është i bazuar në ligj.

Në rast se shitësi ka një origjinë legjitime të pronës, do marri paratë, në rast se nuk e ka, natyrisht që paratë do t’i mbeten Republikës së Shqipërisë dhe patjetër që ato do të përdoren për cilindo që do të provojë se pretendimin mbi pronën e ka të bazuar.

Kështu që këtu merr fund çdo lloj shqetësimi i atyre që janë pretendentë të sinqertë të pronës dhe çdokush tjetër që shfaqet si pretendent me Shqipërinë e shqiptarëve në gojë dhe me kurdisjen e duarve të tjera nga mbrapa mund të vazhdojë të shfaqet, por nuk është më problemi ynë. Nëse ka pyetje jam në dispozicion”.

Pas protestave në Zvërnec dhe nisjes së tyre në Tiranë kryeministri Edi Rama sqaroi gjatë një daljeje publike se projekti do të zhvillohet mbi prona private dhe jo mbi tokë shtetërore./Monitor/