Tensione para Samitit në Tivat, Mali i Zi garanton sigurinë e delegacioneve
Në prag të Samitit BE–Ballkani Perëndimor, që do të mbahet nesër në Tivat, Ministria e Punëve të Jashtme e Malit të Zi ka bërë të ditur se vendi është i përkushtuar të sigurojë mbarëvajtjen e suksesshme të ngjarjes dhe pritjen e delegacioneve pjesëmarrëse në nivelin më të lartë.
Përmes një deklarate, MPJ-ja theksoi se Mali i Zi, si anëtar i përgjegjshëm dhe i besueshëm i NATO-s, u garanton të gjithë mysafirëve dhe pjesëmarrësve një qëndrim të sigurt dhe të këndshëm gjatë zhvillimit të samitit.
“Në prag të Samitit në Tivat, do të bëjmë gjithçka për t’i pritur miqtë, aleatët dhe partnerët tanë në nivelin më të lartë dhe për të siguruar zhvillimin e suksesshëm dhe dinjitoz të këtij eventi ndërkombëtar të rëndësishëm për ne. Si anëtare e përgjegjshme dhe e besueshme e NATO-s, Mali i Zi u garanton të gjithë mysafirëve të vet një qëndrim të sigurt dhe të këndshëm,” thuhet në deklaratën e MPJ-së.
Autoritetet malazeze nënvizuan se prioritet mbetet që asnjë rrethanë dytësore të mos ndikojë në suksesin e këtij takimi ndërkombëtar dhe në realizimin e objektivave të përbashkëta që promovohen përmes tij.
Ky reagim i diplomacisë malazeze vjen një ditë pasi autoritetet e Malit të Zi ndaluan hyrjen në territorin e tyre për rreth 90 shtetas serbë, të cilët janë konsideruar rrezik potencial për sigurinë gjatë samitit.
Në mesin e personave që nuk u lejuan të hynin në vend ka pasur edhe mbështetës të Partisë Përparimtare Serbe në pushtet, si dhe individë të akuzuar për sulme ndaj protestuesve antiqeveritarë në Vojvodinë.
Shtetasit serbë u kthyen nga Aeroporti i Tivatit pasi kishin mbërritur me një fluturim çarter nga Beogradi, në prag të samitit të Bashkimit Evropian dhe Ballkanit Perëndimor që zhvillohet në këtë qytet bregdetar.
Sipas paralajmërimeve, në Tivat pritet të mbërrijë edhe presidenti i Serbisë, Aleksandar Vuçiq, së bashku me zyrtarë të tjerë të lartë nga vendet e rajonit dhe Evropa.
Megjithatë, Agjencia e Sigurisë dhe Informacionit e Serbisë, BIA, njoftoi se e ka këshilluar zyrtarisht presidentin Vuçiç të mos udhëtojë në Mal të Zi për shkak të, siç u tha, “veprimeve armiqësore të shërbimeve të huaja dhe klaneve kriminale” në këtë shtet.
Ndërkohë, mediat serbe raportojnë se pas kthimit të avionit në Serbi, autoritetet serbe kanë shtuar ndjeshëm kontrollet në pikat kufitare me Malin e Zi, duke shkaktuar pritje të gjata për qytetarët malazezë që udhëtojnë drejt Serbisë.
