Tensione në Aeroportin e Vlorës, përplasje mes përfaqësuesve të kompanive MABCO dhe 2A
Ashtu siç ishte paralajmëruar edhe ndodhi sot në ambientet e Aeroportit të Vlorës, ku u përplasën përfaqësues të kompanisë MABCO të Behgjet Pacollit, nënkontraktorëve dhe rojeve të sigurisë të kompanisë “2A” të Valon Ademit, duke hyrë më pas me forcë brenda kantierit prej ku nxorën jashtë punonjësit e tjerë.
Pas kësaj përplasje në Aeroportin e Vlorës ka reaguar përmes rrjetit social Facebook, drejtues i kompanisë “MABCO”, Behgjet Pacolli, duke theksuar se pas muajsh të tërë bllokade të paligjshme dhe uzurpimi të Terminalit të Vlorës nga grupe kriminale, sot MABCO dhe nënkontraktorët tanë kanë mundur të rikthehen në vendet e tyre të punës.
Në këto momente po kryhet verifikimi dhe evidentimi i dëmeve të shkaktuara nga vandalizmi, vjedhjet dhe shkatërrimet e ndodhura gjatë kësaj periudhe, thotë Pacolli ndërsa i bënë thirrje SPAK-ut që të hetojë për çështjen.
“I bëj thirrje urgjente SPAK-ut të nisë menjëherë hetime të plota mbi këtë skandal të rëndë, të krijuar dhe ushqyer nga individë që kanë vepruar dhe vazhdojnë të veprojnë në kundërshtim me ligjin, duke cenuar rëndë shtetin e së drejtës dhe sistemin juridik të Republikës së Shqipërisë. Koha për të zbardhur të vërtetën dhe për të vënë përgjegjësit para drejtësisë është tani.”
Ndryshe, kjo përplasje në Aeroportin e Vlorës erdhi pas paralajmërimit të djeshëm të Behgjet Pacollit përmes rrjetit social Facebook, se çdo veprim ose mosveprim që pengon zbatimin e vendimeve të Asamblesë së datës 18.06.2026 do të konsiderohet shkelje e rëndë e detyrimeve ligjore dhe do të sjellë pasoja të plota ligjore, civile dhe penale, për të gjithë personat përgjegjës.
“MABCO” , sipas Behgjet Pacollit, është zotëruese e 98% të kuotave të kapitalit të VIA-s dhe përbën subjektin kryesor mbajtës të të gjitha detyrimeve, përgjegjësive dhe ekspozimeve që lidhen me koncesionin, në aspektin profesional, teknik, referencial dhe financiar. “MABCO” mban ekspozimin financiar kryesor në këtë projekt, në vlerë që tejkalon 310 milionë euro.
