Rënia e bujqësisë në 2025-n, dobët serrat e drufrutorët, në rritje perimet e njoma! Braktiset blegtoria!

Në vitin 2025, bujqësia dha një kontribut negativ në rritjen ekonomike, me 0.3 pikë përqindje, sipas të dhënave të INSTAT.

Informacioni më i detajuar po nga INSTAT tregon se aktiviteti i serrave ka qenë në rënie, po ashtu dhe gruri, drufrutorët, ullinjtë. Aktivitetet me rritjen më të fortë ishte te perimet e njoma dhe bimët mjekësore.

Në vitin 2025, prodhimi bujqësor në vend, shënoi vlerën 9.731.031 tonë.

– Drithërat arritën në 623.957 tonë, me nivelin më të lartë të prodhimit në Qarkun Fier me 144.404 tonë, ndjekur nga Elbasani dhe Korça.

– Perimet regjistruan një prodhim prej 1.445.286 tonë, me rritje 1.5 për qind, krahasuar me një vit më parë. Fieri, Tirana dhe Berati janë qarqet me prodhimin më të lartë me rreth 62 për qind.

– Prodhimi i grurit shënoi rënie me 10.1 për qind, ndërsa elbi shënoi rritje me 13,6%, duke arritur në 27.027 tonë.

– Bimët mjekësore shënuan rritje përkatësisht me 9.6 për qind, ndërsa prodhimi i patates ka pësuar rënie me 7.2 për qind.

Prodhimi në serra

– Prodhimi në serra përfaqëson 22.1 për qind të perimeve gjithsej, por me një rënie nga viti i kaluar prej 0.9 për qind.

– Qarku i Fierit me 155.905 ton, kontribuon me 48.7 për qind dhe Berati me 97.648 ton me 30.5 për qind të këtij prodhimi. Qarqet Dibër dhe Lezhë paraqesin një tendencë në rritje krahasimisht me vitin e kaluar, me respektivisht 16.3 për qind dhe 5.1 për qind.

Struktura e perimeve

– Perimet e njoma përbëjnë 65,8% të prodhimit total, duke shënuar një rritje prej 1.07 për qind, krahasuar me vitin e kaluar.

– Perimet e thata kanë pësuar rënie, krahasuar me vitin 2024, me 6.7 për qind të prodhimit të kësaj kategorie.

– Kategoria e bostanoreve, për vitin 2025 arriti prodhimin prej 366.675 tonë, duke shënuar rritje prej 5.7 për qind, krahasuar me vitin 2024.

Drufrutorët

– Prodhimi i pemëve frutore ishte 253.450 në vitin 2025, duke pësuar rënie prej 12.8 për qind. Nivelin me të lartë të prodhimit e vërejmë në Qarkun Korçë si kontribuesin kryesor 66.178 tonë, pasuar nga Elbasani dhe Fieri.

– Në grupin e pemëve farore, molla zë peshën kryesore me 81,8% të prodhimit, ndërsa në grupin e pemëve me bërthamë, kumbulla dominon me 41.0 për qind të prodhimit.

– Prodhimi i ullinjve gjatë vitit 2025 arriti në 143.383 tonë me një ulje prej 2.3 për qind, krahasuar me vitin 2024. Qarqet Fier, Elbasan, Berat dhe Vlorë përfaqësojne 83.2 për qind të prodhimit total të ullinjve në vend, duke mbetur zonat kryesore të kultivimit të ullirit në Shqipëri.

– Prodhimi gjithsej i agrumeve në vend është 59.417 tonë, me Qarkun e Vlorës kontribues kryesor në me 60,9%, të prodhimit gjithsej në vend.

Braktiset blegtoria, numri i krerëve ra me 3.8%

Ndërkohë sektori i blegtorisë në vend po përballet me  tkurrje të ndjeshme dhe të vazhdueshme të numrit të krerëve gjatë dekadës së fundit.

Të dhënat zyrtare për 2025 tregojnë një panoramë shqetësuese, ku shumica e kategoritë kryesore të bagëtive kanë shënuar rënie, duke reflektuar vështirësitë në të cilat ndodhet ky sektor jetik i ekonomisë.

Numri i krerëve në total shënoi rënie në vitin 2025 me 3.8 për qind në krahasim me vitin 2024. Vitin që shkoi u numëruan gjithsej 1085 krerë nga 2168 që ishin në vitin 2024.

Në sektorin e gjedhëve, pas një periudhe të gjatë rënieje, të dhënat tregojnë shenja të lehta stabilizimi, ku numri i krerëve u rrit nga 272 mijë në 275 mijë gjatë vitit 2025, duke shënuar një shtim prej 3 mijë krerësh ose 1 për qind në vitin e kaluar.

Ndryshe po ndodh me të imtat, të cilat mbeten kategoria më problematike, pasi numri i përgjithshëm i deleve dhe dhive ra nga 1,792 mijë krerë në vitin 2024 në 1,736 krerë, duke u tkurrur me 56 mijë krerë brenda një viti, ose -3 për qind.

Sektori i derrave regjistroi tkurrjen më të ashpër në raport me madhësinë e tij, duke pësuar një rënie prej 28 për qind ne një vit, nga 104 mijë krerë në vitin 2024 në 2025 u raportuan vetëm 75 mijë krerë, ndërsa popullsia e shpendëve vijoi gjithashtu trendin rënës, duke zbritur nga 6,992 mijë krerë në 2024 në 6,953 krerë në 2025, me tkurrje 1 për qind.

Në kontrast me këto zhvillime, bletaria ka shënuar rritje të shpejtë, ku numri i koshereve u rrit me 58 mijë, duke arritur në 645 mijë krerë në vitin 2025, çka përbën një rritje prej 10% krahasuar me vitin 2024.

Nga viti 2021 në 2025 numri i krerëve të gjedhit ra me 18% dhe i te imtave ra gjithashtu me 18%. Ndërkohe numri i derrave u përgjysmua duke shënuar rënie me 53 për qind pas pandemisë.

Rënia e blegtorisë lidhet me shume arsye ndër të cilat faktori demografik kryeson. Një numër i konsiderueshëm i fermerëve të moshuar po e braktisin blegtorinë për shkak të pamundësisë fizike për të përballuar punën e rëndë, ndërsa brezat e rinj shfaqin interes të ulët për këtë sektor.

Fermerët shpesh hasin vështirësi në vendosjen e produkteve të tyre në treg me çmime konkurruese, gjë që e bën mbajtjen e bagëtive ekonomikisht të paqëndrueshme./Monitor/