Shqiptarët ikin jashtë, udhëtimet rriten me 14.3%; Italia dhe Greqia destinacionet kryesore
Shqiptarët kanë udhëtuar më shumë jashtë vendit gjatë vitit 2025, teksa Italia dhe Greqia vijojnë të mbeten destinacionet më të preferuara.
Të dhënat e publikuara nga Instat në anketën e “Pushimeve dhe Udhëtimeve 2025” tregon se banorët e Shqipërisë të moshës 15 vjeç e lart realizuan rreth 4.5 milionë udhëtime gjatë vitit, për qëllime personale dhe biznesi. Prej tyre, 97.6 për qind ishin udhëtime personale, ndërsa vetëm 2.4 për qind lidhen me biznesin.
Të dhënat tregojnë se udhëtimet jashtë vendit vijuan të zgjerohen me ritme dyshifrore. Krahasuar me vitin 2024, numri i tyre u rrit me 14.3 për qind, e mbështetur nga zgjerimi i linjave ajrore low cost.
Italia mbetet destinacioni më i frekuentuar, duke marrë 11.3 për qind të udhëtimeve, e ndjekur nga Greqia me 10.4 për qind dhe Gjermania me 4 për qind.
Kjo një lidhje e drejtpërdrejtë me destinacionet ku shqiptarët kanë emigruar ndër vite dhe ku pesha e tyre në raport me totalin mbetet e lartë. Një pjesë e konsiderueshme e udhëtimeve u orientuan edhe drejt vendeve të tjera, si Turqia, Spanja dhe Mali i Zi.
Ndryshe nga udhëtimet brenda vendit, ku arsyeja kryesore është pushimi dhe koha e lirë, për udhëtimet jashtë Shqipërisë motivi dominues mbetet vizita te të afërmit dhe miqtë, që përbën 52 për qind të totalit të tyre. Kjo konfirmon peshën që diaspora shqiptare vijon të ketë në lëvizjet ndërkufitare.
Brenda vendit u realizuan 4.4 milionë udhëtime personale, ndërsa “pushime dhe kohë e lirë” përbën qëllimin kryesor me 52.8 për qind të totalit.
Ashtu siç edhe nënvizojnë operatorët turistikë vazhdimit sezonaliteti mbetet i theksuar në vvend. Gushti përqendroi pjesën më të madhe të udhëtimeve me 12.6 për qind, i ndjekur nga Qershori me 10.9 për qind, Dhjetori me 10.2 për qind dhe Korriku me 9.8 për qind, duke reflektuar kulmin e sezonit veror dhe lëvizjet gjatë festave të fundvitit.
Rritja e udhëtimeve është shoqëruar edhe me ndryshime në mënyrën e akomodimit. Gjatë vitit 2025, përdorimi i apartamenteve me qira afatshkurtër, përfshirë platformat si Airbnb, u rrit me 5.9 për qind, ndërsa qëndrimet në hotele u zgjeruan me 5.6 për qind krahasuar me një vit më parë.
Transporti ajror ishte segmenti me rritjen më të fortë, duke shënuar një volum 14% më të lartë, në linjë me zgjerimin e ofertës së fluturimeve dhe rritjen e numrit të pasagjerëve në aeroportin e Tiranës.
Mesatarisht, shqiptarët qëndruan 5.3 netë për çdo udhëtim, ndërsa numri më i lartë i netëve të kaluara u regjistrua në muajt Korrik dhe Gusht.
Për udhëtimet brenda vendit, Tirana mbetet destinacioni më i frekuentuar me 13.7 për qind të totalit, e ndjekur nga Vlora me 12.2 për qind, ndërsa Korça dhe Durrësi ndajnë secili nga 7.3 për qind./Monitor/
