Dita e Pavarësisë SHBA, Prattipati: Le të ngremë dolli edhe për 250 vitet e ardhshme!
nga Ana Prattipati*
Mirëmbrëma ushtruese e detyrës së Presidentes Haxhiu, ushtrues i detyrës së kryeministrit Kurti, ministra, anëtarë të komunitetit diplomatik, miq dhe, veçanërisht, popull i Kosovës.
Jemi mbledhur sonte që ta festojmë një të arritur me të vërtetë historike: përvjetorin e 250-të të pavarësisë së Amerikës.
Para dy shekujve e gjysmë, etërit tanë e krijuan këtë komb të ri mbi themelet e guximit, qëndrueshmërisë, inovacionit dhe besimit të palëkundur se çdo brez mund të ndërtojë një të ardhme më të qëndrueshme e më të begatshme se brezi para tij.
Që nga përpjekjet për realizimin e ëndrrës amerikane deri te mbrojtja e lirisë, e nga hapat e parë në hënë deri te arritjet në teknologji, Shtetet e Bashkuara kanë shikuar gjithmonë drejt së ardhmes, duke u përpjekur vazhdimisht që ta bëjnë më të përsosur unionin.
Ndërsa shënojmë përvjetorin e 250-të, jo vetëm që po i nderojmë të arriturat e së kaluarës, por edhe premtimin për një të ardhme të ndërtuar mbi themele të forta, inovacion dhe mundësi.
Historia e këtyre 250 viteve të para të Amerikës na ka mësuar se shtetet e lira dhe sovrane janë më të fuqishme kur investojnë në njerëzit e tyre, kur qeverisin veten dhe krijojnë mundësi për brezat e ardhshëm. Këto janë parime që vazhdojnë ta udhëheqin partneritetin tonë me Kosovën edhe sot.
E dimë se historia e Amerikës nuk shkruhet vetëm brenda kufijve të saj, por edhe përmes miqësive dhe partneriteteve që i ndërton anembanë botës.
Janë të pakta ato miqësi që e pasqyrojnë këtë frymë si ajo që ekziston mes Shteteve të Bashkuara dhe popullit të Kosovës— marrëdhënie kjo e ndërtuar mbi vlera reciproke, respekt të ndërsjellë dhe besim të përbashkët në një të ardhme me mundësi të panumërta dhe me siguri të plotë.
Gjatë vitit të kaluar, e pata privilegjin të udhëtoja nëpër Kosovë dhe të takoja njerëz që e mishëronin më së miri këtë frymë të bashkëpunimit midis dy shteteve tona.
Kam parë vullnetarë të Korpusit të Paqes duke punuar krah për krah me komunitetet lokale; kam parë ish-bursistë të programeve tona të shkëmbimit duke udhëhequr me vizion dhe integritet, si dhe sipërmarrës të rinj e studentë duke i prirë ndryshimit dhe inovacionit.
Populli i Kosovës është urë që lidh dy popujt tanë dhe dëshmi se vlerat tona të përbashkëta – demokracia, kreativiteti dhe qëndrueshmëria – janë gjallë e po lulëzojnë.
Historia na ka lidhur si shtete me qëllime dhe parime të njëjta. Kosova ka qëndruar gjithmonë krah Shteteve të Bashkuara, duke mbështetur prioritetet tona, duke kontribuar në Forcën Ndërkombëtare të Stabilizimit, Bordin e Paqes, duke investuar në arsim dhe teknologji. Edhe Shtetet e Bashkuara qëndrojnë krah Kosovës. Qëndrojmë përkrah Kosovës në përpjekjet e saj për të ndërtuar institucione të forta demokratike. Qëndrojmë përkrah Kosovës ndërsa punon për të ndërtuar ekonomi të begatshme që tërheq investime dhe krijon mundësi për të gjithë qytetarët e saj. Mirëpresim forcimin e partneritetit tonë, përfshirë rritjen e tregtisë që sjell prosperitet për të dy shtetet tona. Sepse një Kosovë e qëndrueshme, demokratike dhe e begatshme është e mirë jo vetëm për popullin e Kosovës, por edhe për Evropën dhe mbarë botën.
Investimi juaj në programin Fulbright, përkushtimi ndaj inovacionit dhe roli juaj si eksportues i sigurisë, tregojnë se Kosova nuk është vetëm partnere, por prijëse e ardhshme në rajon.
Ndërsa Kosova vazhdon ta thellojë integrimin e saj në bashkësinë ndërkombëtare, mundësitë për bashkëpunim janë të pakufizuara, veçanërisht në mbrojtje, tregti, investime ekonomike dhe energji.
Bizneset amerikane kërkojnë partnerë të besueshëm, fuqi punëtore të kualifikuar dhe tregje konkurruese. Kosova ka potencial t’i ofrojë të tria. Disa prej këtyre bizneseve po e shfaqin punën e tyre këtu sonte. Shpresoj ta shfrytëzoni praninë e tyre që të mësoni më shumë për punën e tyre, për përfitimet që ia sjellin si Shteteve të Bashkuara, ashtu edhe Kosovës.
Dua t’iu drejtohem posaçërisht të rinjve të Kosovës. Ju jeni arkitektët e së ardhmes. E ardhmja u takon atyre që dinë të përshtaten, të krijojnë e të udhëheqin në një botë, e cila po ndryshon me shpejtësi. Pasuria më e madhe e Kosovës është talenti, energjia dhe ambiciet e rinisë së saj.
Zgjedhjet që bëni, vlerat që përfaqësoni dhe ëndrrat që ndiqni do ta formësojnë jo vetëm fatin e Kosovës, por edhe të ardhmen e partneritetit tonë.
Duke punuar së bashku, mund të krijojmë një botë ku mundësitë nuk njohin kufij, ku dallimet zgjidhen nëpërmjet dialogut dhe ku çdo i ri ka rastin të ndërtojë vetë fatin e vet.
Prandaj, sonte, ndërsa festojmë pavarësinë e Amerikës, le të reflektojmë se sa shumë kanë përparuar vendet tona dhe për mundësitë që na presin përpara.
Të frymëzuar nga të arriturat e deritashme, mund ta ndërtojmë një të ardhme me mundësi të panumërta, duke u mbështetur në inovacion dhe me besimin e fortë se ditët tona më të mira janë para nesh.
Faleminderit për miqësinë, besimin dhe vizionin tuaj. Gëzuar Ditën e Pavarësisë! Le të ngremë dolli edhe për 250 vitet e ardhshme!
