2 Korrik 1990, Dita e parë e Pavarësisë së Kosovës
36 vite më parë delegatët e Kuvendit të Kosovës, miratuan Deklaratën Kushtetuese të pavarësisë së Kosovës, e njohur si Deklarata e 2 Korrikut. Në këtë ditë historike, Kosova është shpallur njësi e veçantë, në kuadër të federatës së atëhershme jugosllave që sot mund të quhet edhe Dita e parë e Pavarësisë së Kosovës.
Deklarata Kushtetuese e 2 Korrikut të vitit 1990 u lexua nga Muharrem Shabani delegat, jashtë objektit të Parlamentit, në kushte të rrethimit nga forca të mëdha policore e ushtarake. Me këtë rast, Muharrem Shabani tha se me këtë deklaratë shprehet dhe shpallet qëndrimi burimor kushtetues i popullsisë së Kosovës dhe i këtij Kuvendi si akt i vetëvendosjes politike në kuadër të Jugosllavisë.
Deklaratën Kushtetuese mbi Kosovën si njësi të pavarur dhe të barabartë në kuadër të federatës jugosllave e shpallën në Prishtinë 111 delegatët shqiptarë, po edhe të komuniteteve të tjera të Kuvendit të Kosovës.
Me rastin e 36 vjetorit të Deklaratës Kushtetuese të 2 Korrikut 1990, Parlamenti i Kosovës, në bashkëpunim me Zyrën e Kryeministrit, organizon një diskutim me disa nga delegatët e Kuvendit të 2 Korrikut 1990.
Ky aktivitet organizohet në nderim të një prej ngjarjeve më të rëndësishme në historinë politike të Kosovës, ku do të rikujtohet rëndësia e Deklaratës Kushtetuese të 2 Korrikut dhe kontributi i delegatëve që morën pjesë në miratimin e saj.
Ndryshe, Deklarata e 2 Korrikut 1990, ishte dhe dita e parë e pavarësisë së Kosovës ndonëse klasa politike aktuale me në krye Presidentin Hashim Thaçi, ka bërë përpjekjet maksimale për tjetërsimin e historisëpër ta kthyer këtë akt historik të shtetndërtimit të Kosovës në një akt formal.
