Rigjykimi për krime lufte në Saradran, Ekrem Bajroviç dënohet me 12 vjet burg
Ekrem Bajroviç është shpallur sërish fajtor në rigjykim dhe është dënuar me 12 vjet burg për krime lufte kundër popullatës civile në fshatin Saradran.
Aktgjykimi u shpall sot nga kryesuesi i trupit gjykues, Avni Syla, i cili e shpalli Ekrem Bajroviçin fajtor për veprën penale të krimit të luftës ndaj popullatës civile në bashkëkryerje.
Gjykata vendosi që në dënimin prej 12 vjetësh t’i llogaritet edhe koha e kaluar në paraburgim, duke filluar nga 19 tetori 2022, ndërsa masa e paraburgimit do të vazhdojë deri në plotfuqishmërinë e aktgjykimit. Bajroviç u detyrua gjithashtu të paguajë 300 euro shpenzime gjyqësore dhe 100 euro për kompensimin e viktimave të krimit. Palët kanë të drejtë ankese në afat prej 30 ditësh në Gjykata e Apelit e Kosovës.
Sipas aktakuzës, Bajroviqi, në cilësinë e policit në Stacionin Policor në Gurrakoc, më 8 maj 1999, në bashkëpunim me pjesëtarë të forcave serbe, ndaloi një kolonë civilësh shqiptarë që po largoheshin drejt Shqipëri. Nga kolona u ndaluan 16 burra, të cilët, sipas aktakuzës, u rrahën dhe më pas u pushkatuan. Njëri prej tyre, i identifikuar me inicialet N.E., mbijetoi pasi u plagos rëndë dhe u la mes trupave të viktimave.
Aktakuza e ngarkon Bajroviçin edhe për ngjarjet e 7 majit 1999 në Saradran, ku pretendohet se mori pjesë në arrestimin dhe keqtrajtimin e 84 civilëve shqiptarë. Sipas Prokurorisë, civilët u ndanë nga kolona, u morën paratë dhe sendet me vlerë, më pas u dërguan në Gurrakoc, ku u keqtrajtuan dhe u torturuan, përpara se të transferoheshin në stacionin policor, ku, sipas aktakuzës, kolonës i printe Ekrem Bajroviç.
Ndryshe, Gjykata Themelore e kishte dënuar Ekrem Bajroviçin me 12 vjet burg edhe në korrik të vitit 2024 dhe Gjykata e Apelit e kishte vërtetuar atë aktgjykim duke e hedhur poshtë ankesën e palës mbrojtëse më 2025.
Por, Gjykata Supreme e pranoi ankesën e mbrojtjes më 2025 dhe e rrëzoi aktgjykimin ndaj Bajroviçit, duke thënë se disa dëshmitarë kishin deklaruar gjatë shqyrtimit gjyqësor se për këtë rast kishin dhënë deklarata edhe para autoriteteve të UNMIK-ut dhe EULEX-it, por ato nuk ndodheshin në shkresat e lëndës. Gjykata kishte vlerësuar se këto deklarata duhej të siguroheshin dhe të shqyrtoheshin së bashku me provat e tjera.
