Evropa në zjarr, BE rrit numrin e ekipeve të emergjencës në Greqi, Itali, Francë, Spanjë e Portugali

Zjarret në pikun e nxehtësisë ekstreme po përhapen shumë shpejtë në Spanjë, Greqi, Portugali dhe Francë, ku 10.000 persona u evakuuan në jugperëndim të vendit, ndërsa pritet vendimi i autoriteteve deri në fund të javës nëse etapa e tretë e Tour de France do të anulohet, raportuan sot agjencitë botërore të lajmeve.

Çiklistët pritet të kalojnë sot vijën e finishit në Le Angelo në Pireneje ndërsa zyrtarët e garës shpresojnë se itinerari mund të ndryshohet nëse është e nevojshme.

Për shkak të zjarrit në jugperëndim të Francës, 10.000 njerëz u evakuuan nga rreth njëzet qytete dhe fshatra të vogla pranë kufirit spanjoll, ndërkohë zyrtarët paralajmërojnë se era mund të përhap zjarrin i cili ka përfshirë deri më tani rreth 4.600 hektarë rrëzë Pirenejve franceze.

Mbrojtja Civile e Portugalisë njoftoi se zjarri që po përhapej nga dita e enjete në pjesën qendrore të vendit në zonën e Vouzela është vënë nën kontroll ndërsa ka djegur një sipërfaqe prej 12.000 hektarësh.

Zjarri që shpërtheu pasditën e djeshme në Selanik, vazhdoi të përhapet nëpër pyllin me pisha në rajonin e Mandrës në Greqi.

Ndryshe, Bashkimi Evropian ka rritur numrin e ekipeve të emergjencës të vendosura në zonat me rrezik të lartë në Qipro dhe pjesë të tjera të Greqisë, si dhe në Itali, Francë, Spanjë dhe Portugali, dhe janë në gatishmëri avionë zjarrfikës.