Aleksandar Vuçiç fillon një betejë të re diplomatike për Kosovën, takime me Trump dhe Putin

Në kulmin e debateve rreth korrigjimit të kufijve ndërmjet Kosovës dhe Serbisë, dialogu mes Prishtinës dhe Beogradit do të vazhdojë për më pak se një muaj, ndërsa gjatë shtatorit priten takime të shumta.

Mediat serbe shkruajnë se në shtator, presidenti Aleksandar Vuçiç do të nisë ofensivën diplomatike për Kosovën, ndërkohë që pritet të ketë takime dhe homologun e tij rus Vladimir Putin si dhe atë amerikan Donald Trump.

Ende është e paqartë nëse Vuçiç dhe Putin do të takohen në Moskë apo Vladivostok.

Vuçiç udhëton në Rusi për konsultime me Putin përpara Asamblesë së Përgjithshme të OKB-së të planifikuar prej 24-28 shtator, ku ai do të flasë në një sesion të Asamblesë së Përgjithshme të OKB, shkruan e përdishmja serbe Blic.

Me presidentin e SHBA, Donald Trump, Vuçiç do të takohet në pjesën zyrtare të sesionit dhe pritet të flasë me më shumë njerëz të administratës amerikane në New York.

“Amerika ka zbutur disi qëndrimin e saj kur bëhet fjalë për Kosovën. Pas shumë vitesh, për herë të parë kemi një situatë që ata duan të dëgjojnë se çfarë ka Serbia për të thënë dhe këtë duhet shfrytëzuar maksimalisht”, shkruan Blic.

Para të gjitha këtyre takimeve të rëndësishme ndërkombëtare, presidenti Vuçiç pritet në fillim të shtatorit të vizitojë Kosovën, ku do të bisedojë me qytetarët serbë.