Jo vetëm ushqimet, shqiptarët paguajnë dhe për komunikimin më shumë se mesatarja e BE-së
Krahas ushqimeve, pajisjeve elektroshtëpiake, naftës e të tjera, konsumatorët shqiptarë paguajnë më shtrenjtë se Bashkimi Europian edhe për komunikimin dhe informacionin.
Sipas të dhënave të Eurostat, të përpunuara nga Monitor, indeksi i çmimeve sipas fuqisë blerëse për informacionin dhe komunikimin për Shqipërinë për vitin 2025 ishte 107.6 për qind e mesatares së Bashkimit Europian.
Kjo do të thotë se për të komunikuar përmes celularit, numri fiks, apo për të përdorur internetin, konsumatorët vendas paguajnë 7.6 për qind më shumë sesa një qytetar europian, e matur kjo sipas barazisë së fuqisë blerëse.
Çmimet e komunikimit janë shtrenjtuar vazhdimisht vitet e fundit, teksa tregu i është rikthyer duopolit me vetëm dy kompani. Në 2022-n, çmimet ishte 9% më lirë se mesatarja e BE-së. Në 2023-n për herë të parë u kalua lehtë mesatarja e BE-së 100.5 për qind për të vazhduar shtrenjtimin dhe në 2024-n, 103.1 për qind, për të arritur rekordin në 2025-n.
I gjithë rajoni, në përgjithësi është i shtrenjtë në komunikim, por Shqipëria mban rekord. Më e lirë është Maqedonia e Veriut 84.9 për qind, e vetmja në mesataren e BE-së. Më pas renditen Bosnje Hercegovina 99.9, Serbia 102.7, Mali i Zi 106.1 për qind. Nuk ka të dhëna për Kosovën.
Më të shtrenjtat në Europë për komunikim janë Zvicra 167.0 për qind, Norvegjia 164.1, Islanda 151.6, Belgjika 146.3, Suedia 137. Më të lirat janë Maqedonia e Veriut 84.9, Turqia 70.2, Polonia 67.6, Rumania 56.1 për qind.
Interneti na kushton më shumë
Autoriteti i Komunikimeve Elektronike dhe Postare, AKEP, në raportin e fundit vjetor 2025 ka kryer vlerësimin e përballueshmërisë së shërbimeve të komunikimeve elektronike në Shqipëri, në përputhje me metodologjinë e Bashkimit të Përbotshëm të Telekomunikacionit, International Telecommunication Union, e cila mat koston e shportave standarde të TIK në raport me të ardhurat kombëtare bruto për frymë, GNI/banorë.
Pragu prej 2% i GNI/banorë shërben si kufi referues për përcaktimin e përballueshmërisë së shërbimeve bazë.
Nga të dhënat rezulton se më i shtrenjtë është interneti, i cili po gjen gjithnjë e më shumë përdorim vitet e fundit. Shqipëria ka koston më të lartë të internetit nga rrjetet celulare, në raport me të ardhurat, në rajonin e Ballkanit Perëndimor.
Sipas të dhënave nga Unioni Ndërkombëtar i Telekomunikacioneve, ITU, kosto mesatare e shportës mujore të internetit me brez të gjerë për vitin 2025 në Shqipëri ishte sa 1.69 për qind e të ardhurave mujore bruto, GNI.
Me një nivel të tillë, Shqipëria renditet ndjeshëm sipër vendeve të tjera të rajonit dhe mesatares botërore. Pas Shqipërisë, renditet Maqedonia e Veriut, me 1.31 për qind të GNI, e ndjekur nga Bosnjë-Hercegovina, me 1.17 për qind, Mali i Zi me 1.01 për qind dhe Serbia, me 0.96 për qind. ITU nuk i publikon të dhëna për Kosovën.
Shqipëria ka gjithashtu kosto dukshëm më të larta se mesatarja botërore, prej 1.38 për qind e GNI.
Shqipëria pozicionohet pranë niveleve më të larta në rajon dhe sipër mesatares botërore edhe në shportën e komunikimit me përdorim të lartë – 140 minuta, 20 SMS dhe 5 GB, me 1.95 për qind të GNI.
Me këtë nivel, Shqipëria është vendi i dytë me kosto më të larta të paketës në fjalë në rajon, pas Maqedonisë së Veriut, me 2.1 për qind të GNI. Pas Shqipërisë vijojnë Bosnje Hercegovina, me 1.86 për qind, Serbia, me 1.49 për qind dhe Mali i Zi, me 1.01 për qind.
Mesatarja botërore e kostos për këtë shportë është në nivelin 1.54 për qind./Monitor/
