Misteri për shkarkimin e Hajdarmatajt dhe dyshimet për pasardhësen e tij…

Lëvizja e ndodhur në Prokurorinë e Krimeve të Rënda ngre shumë pikëpyetje dhe mister, jo vetëm për shkak të shkarkimit të Besim Hajdarmatajt, por edhe me emrin e përzgjedhur për të zëvendësuar atë.

Dyshimet lindin për faktin se pse u mor tani ky vendim për të ndryshuar Kreun e Prokurorisë së Krimeve të Rënda, kur më parë ishte paralajmëruar se gjatë kësaj jave, Sajmir Tahiri do të thirrej në organin e akuzës për t’u pyetur lidhur me hetimin që po kryhet ndaj tij.

Hajdarmataj ishte një nga prokurorët e çështjes Tahiri, firmosi kërkesën drejtuar Kuvendit për të lejuar arrestimin e ish-ministrit të Brendshëm 6 muaj më parë. Tashmë që ish-ministri i Brendshëm dorëzoi mandatin e deputetit dhe sikundër deklaroi do të përballej si qytetar i lirë, vjen lëvizja e beftë në rradhët e Prokurorisë.

Nën drejtimin e Hajdarmatajt po kryhen hetimet lidhur me 613 kg kokainë të bllokuar në Portin e Durrësit, që përbën edhe sasinë më të madhe të kësaj lloj droge të kapur në territorin shqiptar.

Po kështu sikundër është raportuar disa çështje të nxehta janë në duart e prokurorëve të Krimeve të Rënda, përfshi këtu edhe zyrtarë të lartë të qeverisë.

Të gjitha këto duket se shtojnë dyshimet lidhur shkarkimin e Hajdarmatajt, megjithëse një lëvizje e tillë ishte paralajmëruar nga opozita.

Në anën tjetër, Marku në cilësinë e Kryeprokurores ka emëruar në këtë detyrë Donika Prelën, prokurore në Durrës. Referuar të dhënave, Kryeprokurorja e Krimeve të Rënda ka një profil të ulët, pothuajse të njëjtë me atë të Kryeprokurores së Përkohshme.

Pas marrjes së detyrës nga Marku, Prela ishte ndër promovimet e para të Kryeprokurores së Përkohshme, e zgjedhur vetëm me votat e deputetëve socialistë. Marku firmosi emërimin e saj në Krye të Prokurorisë së Durrësit.

Por emërimi u shoqërua me një denoncim, sipas të cilit Prela ishte kallëzuar penalisht bashkë me një gjyqtare të këtij qyteti për akuzat e shpërdorimit të detyrës dhe “zhdukja ose humbja e shkresave nga fashikulli”.

Më pas, Arta Marku i caktoi Donika Prelës detyrën për të “hetuar” ekstradimin e Nezar Seitaj, i konsideruar si financier i bandës së narko-trafikut “Habilaj”. Ai u ekstradua me firmën e Prokurores së Përgjithshme të Përkohshme, Arta Marku dhe të ministres së Drejtësisë, Etilda Gjonaj. Por, Prokurorja e Durrësit hetoi  prokurorët, të cilët po hetojnë Habilajt, ndërsa përjashtoi nga hetimi zyrtarët që firmosën ekstradimin e Seitajt.

Gjithashtu rezulton se prokurorja e re e Durrësit ka përfaqësuar akuzën në rastin e arrestimit dhe kontrollit të automjetit të shtetasit Ledion Ruçi, ngjarje e ndodhur në vitin 2012 duke i kërkuar gjykatës lirimin e djalit të deputetit Gramoz Ruçi dhe shpalljen e paligjshme të kontrollit të automjetit ku udhëtonte i dyshuari.

Tashmë, Prela do të drejtojë Prokurorinë e Krimeve të Rënda, bazuar në vendimin e firmosur nga Arta Marku.