Britani e Madhe, 28 vjeçari shqiptar gjendet i vdekur në rrugë, dy persona dyshohen për vrasje 

Një 28 vjeçar shqiptar ka humbur jetën pasi u gjet i plagosur rëndë në një rrugë në qytetin e Leicesterit, në Britaninë e Madhe.

Policia e Leicesterit e identifikoi si Ervin Lita, i njohur edhe me emrin Ervin Axhami.

Sipas autoriteteve, shërbimet e emergjencës u njoftuan rreth orës 06:58 të mëngjesit të së dielës, pasi ekipet e ambulancave së East Midlands gjetën të riun të plagosur rëndë në Compton Road. Por 28-vjeçari u shpall i vdekur në vendngjarje.

Në kuadër të hetimeve, policia arrestoi dy persona, të moshave 36 dhe 27 vjeç, për përfshirje në vrasje, raporton BBC, më pas, ata u liruan me kusht, ndërsa hetimet për zbardhjen e plotë të ngjarjeve vijojnë.

Ndërsa vazhdohet me përcaktimin e rrethanave të plota të asaj që ka ndodhur, analizën e kamerave të sigurisë, ekzaminimin mjeko-ligjor dhe bisedën me dëshmitarët, detektivi Kevin Hames, ka një thirrje”

“Vazhdoj t’i kërkoj kujtdo që ka ndonjë informacion, i cili ende nuk ka folur me ne, të na kontaktojë sa më shpejt të jetë e mundur. Nuk është tepër vonë, prandaj flisni me ne.”