Shuhet Skënder Haluci!

Shuhet Ish-kryetari i Gjykatës së Vlorës, Skënder Haluci. Lajmin për ndarjen e papritur nga jeta të avokatit 64 vjeçar, Skënder Haluci, e ka bërë publik familja.

Haluci ndodhej në bjeshkët e Tropojës, ku kishte shkuar për të pushuar së bashku me familjen. Mëngjesin e sotëm, ai u kishte treguar familjarëve se nuk ndihej mirë dhe disa minuta më pas është gjetur pa shenja jete.

Skënder Haluci shërbeu si gjyqtar në Gjykatën e Vlorës dhe e drejtoi këtë gjykatë gjatë viteve 2011–2014. Në vitin 2020, ai u shkarkua nga detyra në kuadër të procesit të Vettingut, vendim të cilin e konsideroi si një dënim me vdekje që atij i ishte dhënë për herë të dytë.

Herën e parë, Skënder Haluci u akuzua në vitin 1983 se donte t’i bënte atentat Ramiz Alisë në Tropojë. Ai u arrestua gjashtë muaj pas vizitës së Ramiz Alisë në Tropojë dhe u dënua me vdekje. Por, një muaj pas dënimit, Presidiumi i Kuvendit Popullor, ka kthyer dënimin me vdekje, në heqje lirie me 25 vjet burg.