Lufta me flakët,  22 vatra zjarri, 3 ende janë aktive

Gjatë 24 orëve të fundit Ministria e Mbrojtjes ka raportuar 22 vatra zjarri, nga të cilat 3 mbeten aktive dhe 4 janë nën mbikëqyrje.

Në operacionet e shuarjes së zjarreve janë angazhuar 288 forca operacionale dhe 21 automjete zjarrfikëse, ndërsa Forcat e Armatosura kanë mbështetur operacionet nga ajri me 2 helikopterë, të angazhuar në 3 operacione.

Vatrat aktive janë në Malin e Dajtit në Tiranë, në Vajkal në Bulqizë dhe Sllatinë të Dibrës.

Në Malin e Dajtit vijon puna për shuarjen e zjarrit në zonën mbi tunelet e Qafë Mollës. Në operacion u angazhuan 20 forca zjarrfikëse dhe të AZM-së, si dhe 1 helikopter i Forcave të Armatosura. Edhe sot forcat operacionale vijojnë punën në terren.

Në Vajkal të Bulqizës, zjarri vijon aktiv në një sipërfaqe me shkurre dhe dëllinja, në terren shkëmbor. Gjatë operacionit janë angazhuar 40 forca vendore dhe vullnetare, ndërsa për shkak të favorizimit të flakëve nga era u aktivizua edhe 1 helikopter i FA-së.

Gjatë ditës së sotme operacioni është përforcuar edhe me 20 efektivë të Forcave të Armatosura. Nuk ka rrezik për zonat e banuara.

Në Sllatinë të Dibrës, vijon aktive vatra në një sipërfaqe pyjore me ah. Për shuarjen e saj janë angazhuar 33 forca bashkiake, 5 forca të ADZM-së dhe 8 vullnetarë, gjithsej 46 forca, ndërsa për shkak të rrezikut të përhapjes drejt pyjeve me pisha operacioni është mbështetur edhe me 1 helikopter të FA-së. Forcat operacionale vijojnë punën edhe gjatë ditës së sotme.

Ndërkohë, 4 vatra të tjera mbahen nën mbikëqyrje në Qafë të Helmës dhe Arrmollë në qarkun Dibër, si dhe në malin e Dardhës dhe malin e Qukësit në qarkun Elbasan. Situata në këto zona është nën kontroll ose e izoluar dhe, sipas raportimeve, nuk paraqitet rrezik për zonat e banuara.

Agjencia Kombëtare e Mbrojtjes Civile, AKMC, vijon të ndjekë në mënyrë të pandërprerë situatën në të gjithë territorin e vendit, në koordinim të ngushtë me prefekturat, bashkitë dhe të gjitha strukturat e sistemit të Mbrojtjes Civile.