Cilët janë turistët më të sjellshëm në botë?

Një sondazh i ri ka renditur turistët sipas mënyrës se si sillen gjatë udhëtimeve, por edhe sipas bakshisheve që lënë, shumave që shpenzojnë, dëshirës për aventura dhe interesit për ushqimin vendas. Sipas rezultateve, japonezët janë turistët më të sjellshëm në botë, ndërsa pas tyre renditen norvegjezët dhe zviceranët.

Studimi u realizua nga SafariBookings.com, një platformë online e specializuar në safari në Afrikë, e cila pyeti 192 operatorë turistikë për eksperiencat e tyre me vizitorë nga vende të ndryshme.

Operatorëve iu kërkua të përcaktonin se cilat kombësi dallohen në pesë kategori: turistët më të sjellshëm, ata që lënë bakshishet më të mira, ata që shpenzojnë më shumë gjatë udhëtimeve, turistët më aktivë dhe aventurierë dhe ata që tregojnë interesin më të madh për ushqimin.

Japonezët, turistët më të sjellshëm

Në renditjen për sjelljen më të mirë gjatë udhëtimeve, Japonia zuri vendin e parë, duke marrë 21.1 për qind të vlerësimeve të operatorëve turistikë. Në vendin e dytë u renditën turistët nga Norvegjia, me 10.6 për qind, ndërsa shumë pranë tyre ishin zviceranët, me 10.4 për qind. Pas tyre renditen turistët kanadezë dhe amerikanë. Në fund të renditjes gjenden turistët italianë. Vetëm 1.3 për qind e operatorëve të pyetur i konsideruan italianët si kombësinë më të sjellshme gjatë udhëtimeve.

Megjithatë, operatorët turistikë vlerësuan në përgjithësi interesin që turistët europianë tregojnë për destinacionet që vizitojnë. Një operator turistik në Zanzibar, për shembull, evidentoi interesin e madh të vizitorëve europianë për sjelljen e kafshëve të egra dhe ruajtjen e natyrës, duke theksuar se ata bëjnë shpesh pyetje të detajuara gjatë tureve safari.

Amerikanët lënë bakshishet më të mëdha

Në kategorinë e bakshisheve, diferenca mes kombësive është shumë më e theksuar. Turistët amerikanë rezultojnë më bujarët, duke marrë 29.5 për qind të vlerësimeve të operatorëve. Rezultati i tyre është dukshëm më i lartë se ai i çdo kombësie tjetër. Pas amerikanëve renditen gjermanët, me 13.1 për qind, kanadezët, me 10 për qind, dhe zviceranët, me 8.6 për qind. Rezultati nuk është krejtësisht befasues, duke pasur parasysh se kultura e bakshisheve është shumë më e përhapur në Shtetet e Bashkuara sesa në shumë vende të tjera. Amerikanët janë edhe turistët që shpenzojnë më shumë. Shtetet e Bashkuara kryesojnë edhe një kategori tjetër: atë të shpenzimeve gjatë udhëtimeve. Sipas operatorëve turistikë, amerikanët janë turistët që shpenzojnë më shumë para, duke marrë 24 për qind të vlerësimeve. Në vendin e dytë renditen gjermanët dhe kanadezët, të dy me nga 12.8 për qind. Kështu, turistët amerikanë dallohen njëkohësisht si për bakshishet që lënë, ashtu edhe për nivelin e përgjithshëm të shpenzimeve gjatë pushimeve.

Gjermanët janë turistët më aventurierë

Kur bëhet fjalë për pushime aktive dhe aventura, Europa dominon renditjen. Tre vendet e para u përkasin turistëve europianë. Gjermanët renditen të parët, me 21.1 për qind të vlerësimeve, duke u cilësuar si turistët më të prirur për aventura dhe aktivitete gjatë udhëtimeve. Pas tyre vijnë francezët, me 17.8 për qind, dhe holandezët, me 11 për qind. Në anën tjetër të renditjes janë britanikët dhe indianët, të cilët morën nga 4.5 për qind, ndërsa turistët spanjollë regjistruan 4.3 për qind. Sipas sondazhit, këto kombësi duket se janë disi më të prirura drejt pushimeve të qeta sesa drejt aktiviteteve aventuriere.

Kush udhëton për të ngrënë?

Një tjetër pjesë e sondazhit analizoi turistët që tregojnë interesin më të madh për gastronominë dhe ushqimin vendas. Në këtë kategori dominojnë kryesisht vendet aziatike. India renditet në vendin e parë, ndërsa Japonia zë vendin e dytë. Në vendin e tretë është Franca, me 12.4 për qind të vlerësimeve, ndërsa Kina renditet e katërta. Holanda plotëson pesëshen e parë, me 7.7 për qind, vetëm 0.1 pikë përqindjeje më shumë se Italia, e cila renditet e gjashta. Në përgjithësi, rezultatet tregojnë se kombësitë që dallohen gjatë udhëtimeve ndryshojnë ndjeshëm sipas aspektit që merret në konsideratë: japonezët fitojnë për mirësjelljen, amerikanët për bakshishet dhe shpenzimet, gjermanët për aventurën, ndërsa indianët kryesojnë për interesin ndaj ushqimit dhe gastronomisë./Euronews/ Monitor/