Rekordi i Melonit: Me qeveri më jetëgjatë që nga Lufta e Dytë Botërore

Kryeministrja italiane Giorgia Meloni bëri histori me qeverinë e saj të krahut të djathtë, e cila ka qenë në pushtet vazhdimisht për më gjatë se çdo qeveri tjetër që nga themelimi i Republikës Italiane në vitin 1946 që nga e premtja.

49-vjeçarja Meloni tejkaloi rekordin e mëparshëm të mbajtur nga qeveria e dytë e Silvio Berlusconit, e cila ishte në pushtet nga viti 2001 deri në vitin 2005.

Rekord i ri në pushtet

Meloni, e cila gjithashtu kryeson partinë e ekstremit të djathtë Vëllezërit e Italisë, ka qenë kryeministre për 1.413 ditë duke përfshirë dhe ditën e sotme. Ajo u betua më 22 tetor 2022, si gruaja e parë që drejtoi një qeveri italiane.

Qeveria e dytë e Berlusconit zgjati 1.412 ditë.

Politika italiane e paqëndrueshme

Italia është karakterizuar nga ndryshime të shpeshta të qeverisë dhe paqëndrueshmëri politike në dekadat e fundit. Që nga themelimi i republikës 80 vjet më parë, vendi ka pasur 68 qeveri, të cilat zgjatën mesatarisht vetëm rreth 13 muaj.

Koalicioni aktual i tre partive të krahut të djathtë dhe konservator ka qenë në pushtet për gati katër vjet.

Rekordi vlen vetëm për një mandat të pandërprerë në detyrë për një qeveri të vetme. Nëse mbledhni mandatet e shumë qeverive të udhëhequra nga i njëjti kryeministër, Berlusconi është ende përpara Melonit, me më shumë se nëntë vjet në pushtet.

Sipas këtij kriteri, Meloni është aktualisht në vendin e shtatë.

Festim në Bari, kritika për stanjacion

Girorgia Meloni po e paraqet jetëgjatësinë e qeverisë së saj si një sukses të madh. Partia e saj ka planifikuar për sot në mbrëmje një tubim në qytetin portual jugor të Barit, për të shënuar momentin historik, dhe Meloni pritet të flasë në tubim.

Kritikët e akuzojnë atë se e ka kthyer jetëgjatësinë e qeverisë së saj në një qëllim në vetvete dhe paralajmërojnë një stanjacion politik.