Kryeministri i Belgjikës, Bart De Wever, jep dorëheqjen, Mbreti përpjekje për zgjidhjen e krizës

Kryeministri i Belgjikës, Bart De Wever, dha dorëheqjen sot pasi bisedoi me Mbretin Philippe për pak më shumë se një orë e gjysmë në Pallatin Mbretëror në Bruksel, bëri të ditur Pallati.

Tani pritet që Mbreti ta shqyrtojë këtë vendim dhe të konsultohet me krerët e partive të koalicionit duke filluar nga nesër, raporton VRT.

Mbreti Philip tha se i vjen keq që nuk u arrit asnjë marrëveshje për buxhetin gjatë debatit të mbrëmjes së të dielës në qeveri dhe shtoi se Belgjika nuk mund të përballojë një krizë të zgjatur politike.

Gjithashtu, ai u bëri thirrje të gjitha palëve të përfshira në bisedimet për buxhetin “t’i japin përparësi interesit publik dhe gatishmërisë për kompromis”.

Pritet që Mbreti të takohet sërish me Kryeministrin të premten.

Më herët këtë mëngjes, media raportoi se qeveria belge dështoi përsëri mbrëmë të arrinte një marrëveshje për buxhetin e vitit të ardhshëm, pas së cilës u raportua se Kryeministri mund të jepte dorëheqjen.

Ndryshe, Qeveria e Belgjikës ka debatuar për muaj të tërë për shkurtime buxhetore me vlerë 10 miliardë euro dhe rritje të taksave.

De Wever pretendon se këto masa janë të nevojshme për të mbajtur nën kontroll financat shtetërore.

Partia e tij nacionaliste flamande N-VA dhe MR liberale po kërkojnë shkurtime në shpenzimet shëndetësore, ndërsa partnerët e tyre socialistë dhe të qendrës në koalicion po kërkojnë taksa më të larta mbi pasurinë.

Normat e interesit për obligacionet qeveritare belge janë rritur ndjeshëm në muajt e fundit.