Berlini refuzoi t’u paguajë hakerëve dy milionë euro, ata publikuan 1.4 milionë dosje

Grupi i hakerave Rhysida ka publikuar në “dark web” pothuajse gjashtë terabajt të dhëna nga administrata e Berlinit, duke përfshirë informacione që dyshohet se janë jashtëzakonisht të ndjeshme. Pothuajse 1.44 milion dosje janë publikuar, por administrata e Berlinit dhe udhëheqja politike ende nuk kanë bërë ndonjë deklaratë të rëndësishme në lidhje me ngjarjen, raporton Euronews.

Publikohen planet konfidenciale të mbrojtjes

Midis dokumenteve është një dosje e quajtur “AG CBRN-Rahmenplanung”. Shkurtesa CBRN qëndron për kërcënime kimike, biologjike, radiologjike dhe bërthamore. Kjo do të thotë që skenarët tepër sekret për kërcënime të tilla tani janë të disponueshme publikisht, duke u lejuar grupeve terroriste dhe shërbimeve inteligjente së huaja të kenë akses në to.

“Një sulm që kërcënon drejtpërdrejt shtetin”

Gazetari investigativ Lars Winkelsdorf përmes rrjetit social X vlerësoi se sulmin kibernetik është i përmasave që kërcënon drejtpërdrejt shtetin.

“Përveç dokumenteve nga policia kriminale e shtetit, LKA, që lidhen me hetimet, dosjet përmbajnë edhe plane të mbrojtjes kombëtare. Këto përfshijnë kanalet sekrete të komunikimit për fatkeqësi të qeverisë federale, të dhëna mbi kompanitë e mbrojtjes dhe planet e krizave të agjencive qeveritare,” shprehet Winkelsdorf.

Të dhënat personale të zyrtarëve gjithashtu u zbuluan

Një sasi e madhe e të dhënave personale, kryesisht të nëpunësve civilë, u publikua gjithashtu. Kjo përfshin certifikata lindjeje, të dhëna mungesash, numra telefoni privatë dhe adresa shtëpie.

Shantazhi prej dy milionë eurosh u refuzua

Hakerët kishin kërcënuar më parë se do të publikonin të dhënat dhe kishin kërkuar një shpërblim prej 30 Bitcoinësh, që është ekuivalent me rreth dy milionë euro. Ata caktuan një afat që skadonte të premten rreth orës 15:35.

Senati i Berlinit kishte thënë tashmë para afatit se nuk do ta pranonte në parim një shantazh të tillë.

Menjëherë pas afatit, i gjithë paketa e të dhënave u publikua në “rrjetin e errët”dark web”.