Virusi i Nilit Perëndimor po përhapet në të gjithë Evropën. Tre të vdekur në Holandë

Tre persona në Holandë kanë vdekur në javët e fundit nga infeksioni me virusin e Nilit Perëndimor, raporton sot Instituti holandez i Shëndetit Publik, RIVM, pas një rritje të rasteve në Evropë.

RIVM raportoi vdekjen e parë nga virusi i Nilit Perëndimor muajin e kaluar, një javë pasi u regjistrua infeksioni i parë në Holandë që nga viti 2020. Instituti tani tha se numri i personave të infektuar ishte rritur në 18, me dy persona të tjerë që vdiqën në një spital holandez.

Sëmundje e rëndë në 1 në 150 të infektuar

Virusi i Nilit Perëndimor transmetohet kryesisht tek njerëzit nga pickimet e mushkonjave. Sipas Organizatës Botërore të Shëndetësisë, WHO, ai mund të shkaktojë sëmundje të rëndë tek 1 në 150 persona të infektuar.

WHO tha se temperaturat më të ngrohta po u japin mushkonjave një periudhë më të gjatë dhe një zonë më të gjerë për të përhapur virusin e Nilit Perëndimor në të gjithë Evropën, e cila ka shënuar një numër rekord valësh të nxehti gjatë këtij viti.

Ndryshe, rastet e virusit të Nilit Perëndimor janë rritur gjithashtu në Greqi dhe Itali.