Paketat celulare sociale, njëri nga operatorët zbaton detyrimin e vendosur nga Autoriteti Konkurrencës

Në muajin korrik, Autoriteti i Konkurrencës mbylli një hetim për tregun me pakicë të shërbimeve celulare në vend. Megjithëse nuk provoi shkelje të ligjit “Për mbrojtjen e konkurrencës”, Autoriteti vendosi disa masa detyruese ndaj operatorëve.

Vendimi i datës 24 korrik përcaktonte se brenda 90 ditëve, të dy operatorët duhet të ofronin paketa të veçanta më të favorshme për pensionistët dhe studentët 18–23 vjeç.

Megjithëse vendosja e një detyrimi të tillë ngriti pikëpyetje të mëdha lidhur me bazën ligjore dhe të drejtën e Autoritetit të Konkurrencës për të aplikuar masa të tilla, deri tani, njëri nga operatorët celularë në vend, megjithatë, ka vendosur ta zbatojë detyrimin.

Operatori në fjalë ka nisur të ofrojë paketa të veçanta tarifore për klientët mbi 62 vjeç dhe përfitime shtesë për abonentët e rinj, të moshës 18-25 vjeç.

Konkretisht, për klientët mbi 62 vjeç ofrohet një plan me parapagesë që do të përfshijë 100 minuta, 1 GB internet dhe 5 GB internet për t’u përdorur vetëm të dielave, kundrejt një çmimi prej 900 lekësh. Gjithashtu, një paketë e ngjashme, por me ndryshimin që do të përfshijë edhe 500 SMS, do të ofrohet edhe me paspagesë (kontratë), kundrejt një çmimi prej 800 lekësh në muaj.

Në fakt, këto paketa kanë çmim më të lartë se paketa më ekonomike me parapagesë e operatorit në fjalë, që kushton 600 lekë dhe përfshin 50 minuta dhe 50 MB internet në muaj, por megjithatë përfshijnë një sasi më të madhe të njësive të komunikimit.

Për të rinjtë e moshës 18-25 vjeç në segmentin me parapagesë do të ofrohen dy aktivizime falas me internet pa limit, me kohëzgjatje 5 orë secili. Secili sesion mund të aktivizohet në çdo moment gjatë vlefshmërisë së paketës aktive. Për përdoruesit e kësaj moshe në planet hibride do të ofrohen 2 GB internet shtesë falas, të aktivizueshme një herë në muaj dhe të vlefshme deri në fund të muajit. Aktivizimi i këtyre përfitimeve mund kryhet vetëm përmes aplikacionit të operatorit.

Në vendimin e Autoritetit të Konkurrencës të muajit korrik përcaktohet se, nga analiza e paketave tarifore të ofruara nga Vodafone Albania dhe One Albania rezultoi se gjatë periudhës objekt hetimi ndërmarrjet nuk ofronin paketa të dedikuara për 13 kategori të veçanta konsumatorësh, si pensionistët dhe studentët, me kushte tarifore të përshtatura me nevojat dhe aftësinë paguese të tyre. Gjithashtu, nga hetimi u konstatua një reduktim i ofertave me çmime të ulëta dhe orientimi i portofolit drejt paketave me çmime dhe përmbajtje më të larta, ndërkohë që paketat bazë me vlerë 500–600 lekë ofroheshin kryesisht nëpërmjet kanaleve digjitale.

Sipas vlerësimit të Autoritetit të Konkurrencës, këto zhvillime kufizonin mundësitë e zgjedhjes për konsumatorët me konsum dhe aftësi paguese më të ulët, veçanërisht për kategoritë e pensionistëve dhe studentëve.

Në fakt, ndërhyrja në tregjet me pakicë të shërbimeve të komunikimit është atribut ligjor i rregullatorit sektorial. Deri tani, Autoriteti i Komunikimeve Elektronike dhe Postare nuk ka vlerësuar ekzistencën e nevojës për të ndërhyrë në tregun me pakicë apo për të përfshirë, eventualisht, shërbimet e komunikimeve celulare në konceptin e shërbimit universal, që parashikon ofrimin e shërbimeve të caktuara me çmime të përballueshme nga të gjithë./Monitor/