Ambasadorë, na dogji malli!
nga Agim Popoci
Foli më në fund edhe Lali Eri, por, tashmë nuk ka më rëndësi as për BE dhe as për SHBA që pipëtinin se krijuan SPAK-un, kur shqiptarët e kishin thënë me kohë e tani Kryeministri Edi Rama e thotë me gojën e Ministrit të Drejtësisë, Toni Gogu, se ai i jep urdhra Prokurorisë së Posaçme dhe do ta kalbë në burg Kryetarin e Bashkisë Tiranë!
Mos të flasim pastaj për Mbretërinë e Bashkuar që numëronte teshtimat e Saliut dhe reagonte kur ato ishin paksa më akustike, dhe, sot nuk e shqetëson asgjë nga bëmat kriminale të Edi Ramës!
Po, shqiptarët e dinë se Ambasadorët në Tiranë mbrojnë interesat e shtetit të tyre sepse këtë e kishte thënë me kohë partia e Edi Ramës, ama të shkretët i dogji malli për një qik reagim, për një afsh perëndimor, që ti kenë parasysh herë pas here familjarët e tyre, të cilët morën botën në sy vetëm pasi u kthjelluan, se kur Edi Rama vjedhë fajet i ka dhe do ti ketë Saliu; E ata të qetë, me hallet e tyre familjare vazhduan jetën ndërsa numërojnë ditët kur do t’ju troket Tao me zarf në dorë, se erdhi dita e gjykimit dhe sërish duhet të votojnë për Edi Ramën!
Ambasadorë, shqiptarët i dogji malli, djegie ku e ku më e rëndë se ajo e çobanit komunist Shefqet Peçi, në këto ditë të vështira kur dëgjojnë mbi moralin e Lali Erit dhe detyrohen ti besojnë sepse ky ishte më i besuari i Edi Ramës në ditët kur ju nuk heshtnit por e mbështesnit Kryeministrin e Shqipërisë pa ndonjë vërejtje!
Kjo dramë shqiptare nuk mund të kishte tjetër epilog sepse Edi Rama nuk u krijua nga hiri por nga krimi, dhe nuk u mbështetë nga ndonjë i dërguar i një planeti tjetër por nga ju, Ambasadorë!
Nga ju që ishit tifozë të zjarrtë të Edi Ramës kur ai shkatërroi opozitën ndërsa ju liderin e kësaj opozite e shpallët “non grata” duke klithur pasi Rama e degdisi në arrest shtëpie; E shqiptarët e shkretë nuk kuptonin asgjë nga këto gjëra, vetëm sa po nuhatnin aromë Perëndimi!
Perëndim, e kuptuan edhe mbështetjen tuaj për “shtëpinë e mallit” – gjithë Shqipërinë, dhe krimin e patolerueshëm perëndimor të shndërrimit të një ahuri në shtëpi malli!
Aromë Perëndimi thanë shqiptarët na qenka edhe vjedhja e 50 milionë dollarëve nga Belinda Co vetëm në një tunel duke u bazuar në heshtjen tuaj, sepse ju ishit ata që kishit tundur shkrime gazetash dhe kishit gërthitur nëpër kancelaritë diplomatike për korrupsionin e Saliut!
Ujë Perëndimi thanë shqiptarët qenka edhe furnizimi i miqve të Sami Manes me tubin mes përmes Labërisë, kur ajo vuan me mall për ujë dhe nuk e lagë dot as Kuçin!
E kur ujit të pijshëm nuk i bëjnë derman, shqiptarët e gjejnë Perëndimin edhe në ujërat e zeza që çdo ditë me kënaqësi perëndimore e ndjejnë në Lanë, mu në mes të kryeqytetit, ku ju të llahtarisur mrekulloheshit me buzë në gazë se sa e pastër është Tirana edhe kur mes për mes saj nuk rrjedh Drini plak e i përrallshëm, por, kanalizimi!
Rrugë Perëndimi qenkan edhe këto rrugët e Edi Ramës që shemben sapo të ndërtohen, madje heshtni edhe kur njëri prej juve, Ambasadorë, ngel në Pogradec sepse nuk ka nga t’ia mbajë dhe nuk reagon dot sepse rrugën nuk e bëri Saliu!
Madje, Art Perëndimi doli se është edhe kur shembet Tetari Kombëtar, i padëgjuar por i mbështetur nga ju edhe kur artistët u tërhoqën zvarrë nga policia e Edi Ramës sepse kishin mëkatuar rëndë, e donin Teatrin!
Pra, Ambasadorë, që edhe kur heshtin flasin për admirimin që gëzojnë ndër shqiptarë ndonëse është vetëm shpura e Edi Ramës ajo e cila i bën avokatinë duke përsëritur se ata përfaqësojnë interesat e shtetit të tyre!
A thua vallë ky na qenka Interes i Perëndimit, që shqetësohet për korrupsionin e Saliut dhe mbyllë veshët dhe sytë edhe kur OSBE thotë se Kryeministri Edi Rama ka pasuri prej 200 milionë eurosh pa u bërë as 12 muaj në pushtet, dhe është ky Perëndim që vazhdoj dhe e mbështeti Ramën deri në shkatërrimin total të Shqipërisë!
Interes i Perëndimit qenka kur Ambasadorja e Sorosit, Yuri Kim, i jep opozitës bar dhe hesht për kultivimin dhe tregtinë e barit të Edi Ramës drejt Evropës dhe jo vetëm! Apo ndoshta Interes Amerikan është dhe grisja nga Edi Rama e marrëveshjes për zgjedhjet e vitit 2021, sepse sondazhit i konfirmonte se PD me opozitën e bashkuar do të dal fituese!
Ose, Interes i Mbretërisë së Bashkuar na del pandehur Kryeministër Edi Rama vetëm pse e thotë një Ambasadorë i këtij shteti; Një britanikas i Edi Ramës që detyrë funksionale kishte të keqtrajtoj kuksianët pa e kuptuar se terrori shtetëror i qeverisë shqiptare dhe La Manche, mund ta lënë pa punë, ashtu siç ndodhi!
Ambasadorë, shqiptarët i dogji malli jo vetëm pse foli Lali Eri dhe ju heshtët sepse Lalin e krijoi Edi Rama ashtu siç ju bëri juve pa gojë, pa veshë, pa ndjenja, pa asgjë perëndimore, madje edhe pa arsye pse jeni këtu, pse ekzistoni!
Ambasadorë, shqiptarët i dogji malli për të vërtetën Tuaj në të cilën besuan, pra, për pak jetë, rrugën e cilës ju e mbyllët duke vazhduar të bëni me gisht nga Edi Rama si zgjidhja e vetme!
Ambasadorë, nëse e vërteta Juaj buron vetëm nga lekët e Edi Ramës ashtu siç ishte e vërteta e Saimir Tahirit, Arben Ahmetajt, Belinda Ballukut, Lali Erit etj. Ju e keni keqpërdor popullin e vjedhur shqiptarë ashtu siç bënë komunistët nga viti 1945!
Në fund, Ambasadorë, me shqiptarët dështuat edhe Ju, me një dallim thelbësor, i vjedhuri nuk është vendi juaj, drejt të cilit do të niseni i qetë me përfundimin e mandatit duke i kthyer kurrizin dënesës shqiptare:
Ambasadorë, na dogji malli për liri!
