Ndërron jetë avokati Saimir Vishaj

Ka ndërruar jetë në moshën 60 vjeçare avokati Saimir Vishaj. Ai ishte prej disa ditësh i shtruar në Spitalin e Traumës, ku ndodhej i intubuar, pas dëmtimeve të marra nga një rrëzim në shkallë.

Saimir Vishaj ishte rrëzuar në rrethana që ende nuk janë bërë plotësisht të ditura, duke pësuar disa dëmtime. Pavarësisht trajtimit mjekësor, ai nuk ka mundur t’u mbijetojë plagëve.

Në gusht të vitit 2025, avokati kishte rrëfyer se si kishte kaluar një sëmundje të rëndë, për shkak të së cilës kishte qëndruar për një periudhë në gjendje kome dhe i intubuar, por fatmirësisht kishte arritur të rikuperohej.

Ndryshe, Saimir Vishaj ishte një nga avokatët penalistë më të njohur në vend. Ai ka drejtuar Shoqatën e Avokatëve Penalistë të Shqipërisë, ka qenë anëtar i organeve drejtuese të Dhomës Kombëtare të Avokatisë, si dhe pedagog në Universitetin “Luarasi”.