Kryetari i Listës Srpska, Goran Rakiç, tha sot, se në shtator do ta vizitojë Kosovën presidenti i Serbisë Aleksandar Vuçiç, i cili pas konsultimeve me përfaqësuesit e Listës Serbe do ta paraqesë qëndrimin e tij lidhur me zgjidhjen e çështjes së Kosovës.

“Vuçiç konsultohet gjithmonë me Listën Srpska”, tha Rakiç për Televizionin Pink duke shtuar se ata po mundohen të zgjidhin çështjen e Kosovës, në mënyrë që serbëve në Kosovë t’u garantohet siguri dhe jetë më e mirë.

“Nëse ndarja ose korrigjimi i kufijve nuk sjellin më shumë siguri dhe jetë më të mirë atëherë nuk kanë asnjë vlerë,” tha Rakiç duke shtuar se opozita serbe është kundër në çdo rast dhe nuk ofron asnjë zgjidhje dhe askush s’e di se për çka punojnë ata.

“Na lini rehat njerëz. Na lini të jetojmë në Kosovë dhe me presidentin tonë të gjejmë zgjidhjen më të mirë për qytetarët,” tha Rakiç duke shtuar që “udhëheqësit fetarë le të bëjnë punën e tyre”.

Ndryshe, Presidenti i Serbisë, Aleksandar Vuçiç ka paralajmëruar dje se “nëse çdo gjë do të jetë në rregull”, do ta vizitojë Kosovën më 9 shtator ndërsa disa media të Beogradit kanë raportuar sot se në këtë kohë do t’i publikojnë edhe detajet e planit shtetëror të Serbisë për zgjidhjen e çështjes së Kosovës.