DOKU.TECH, Kurti: Kosova ka mundësi të jashtëzakonshme në zhvillimin teknologjik

E ardhmja po ndërtohet përmes vendimeve që merren sot, dijes që zhvillohet dhe mundësive të reja që krijohen, tha Kryeministri i Kosovës, Albin Kurti, në ceremoninë zyrtare të hapjes së edicionit të XIII-të të DOKU.TECH, ku ka theksuar rëndësinë e teknologjisë dhe inovacionit për zhvillimin ekonomik të vendit.

Duke folur për temën e këtij viti, “E ardhmja thërret”, Kurti vlerësoi potencialin e Kosovës në sektorin e teknologjisë, duke theksuar se vendi ka një popullsi të re dhe talent të dëshmuar në këtë fushë.

“Për Kosovën me popullsinë e saj të re dhe me talentin tashmë të dëshmuar në teknologji, këto zhvillime padyshim se përfaqësojnë një mundësi të jashtëzakonshme,” tha Albin Kurti duke shtuar se në Kosovë janë mbi 2.500 kompani të teknologjisë së informacionit dhe komunikimit, ndërsa eksporti i shërbimeve në këtë sektor është rritur më shumë se pesëfish në katër vjet.

Kryeministri i Kosovës ka bërë të ditur se sektori i teknologjisë së informacionit dhe komunikimit përbën 6 për qind të bruto produktit vendor.

Ambicia e Kosovës, tha ai, duhet të jetë jo vetëm eksportimi i shërbimeve teknologjike, por edhe zhvillimi i produkteve, platformave dhe zgjidhjeve inovative brenda vendit.

Duke folur për digjitalizimin e shërbimeve publike, Kurti ka përmendur platformën e-Kosova, e cila ofron mbi 330 shërbime digjitale, si dhe lansimin e fundit të platformës kombëtare të identifikimit elektronik, nënshkrimit elektronik dhe kuletës digjitale.

Me këtë rast, Kryeministri i Kosovës ka folur edhe për zhvillimin e Inteligjencës Artificiale, duke vlerësuar se ajo krijon mundësi për inovacion dhe rritje të produktivitetit, por ka shtuar se përdorimi i saj duhet të respektojë të drejtat e qytetarëve, privatësinë dhe sigurinë e të dhënave.