Në kuadër të aktivitetit “Ditët e Kosovës” sot u mbajt Forumi i Biznesit Izmir-Kosovë, ku u diskutuan mundësitë për bashkëpunim tregtar dhe investime ndërmjet dy palëve.
Në këtë organizim, që synon forcimin e lidhjeve historike, kulturore dhe ekonomike ndërmjet Kosovës dhe Izmirit të Turqisë, në fokus ishin mundësitë e bashkëpunimit dhe partneritetet strategjike ndërmjet dy vendeve.
Duke folur në këtë aktivitet, ministri i Punëve të Brendshme i Kosovës, Xhelal Sveçla, theksoi rëndësinë e madhe që ka Turqia për Kosovën, duke thënë se Turqia është një nga vendet që kontribuon më së shumti për vendin tonë. Sveçla theksoi se Turqia e ka mbështetur vazhdimisht Kosovën, ndërsa marrëdhëniet ndërmjet dy vendeve kanë avancuar edhe më tej përmes bashkëpunimeve strategjike.
Në Kosovë po realizohet prodhimi i përbashkët i municioneve dhe se të dy vendet kanë arritur marrëveshje për prodhimin e përbashkët të armëve dhe municioneve sipas standardeve të NATO-s, tha Sveçla duke iu referuar bashkëpunimit në fushën e industrisë së mbrojtjes, ndërsa i vlerësoi me rëndësi strategjike për Kosovën që do t’i sjellin vendit vlerë të shtuar.
Guvernatori i Izmirit, Süleyman Elban, u shpreh se marrëdhëniet e binjakëzimit ndërmjet pushteteve lokale, investimet e ndërsjella dhe shkëmbimet e nxënësve e studentëve do t’i forcojnë edhe më shumë raportet ndërmjet dy vendeve.
Ndërkaq, Kryetari i Komunës së Izmirit, Cemil Tugay, theksoi rëndësinë e zhvillimit të bashkëpunimeve që kontribuojnë në zhvillimin e të dy vendeve dhe qyteteve. Ai njoftoi se në muajin prill planifikohet të organizohet një aktivitet në Kosovë për promovimin e qytetit të Izmirit.
Në kuadër të aktivitetit dyditor “Ditët e Kosovës në Izmir”, sot po promovohen qytetet, kultura, arti dhe gastronomia e Kosovës. Në hapësirat e Qendrës Kulturore të Fabrikës Historike të Gazit janë vendosur stenda ku vizitorëve u prezantohen qytetet e ndryshme të Kosovës, si dhe specialitete të kuzhinës kosovare dhe asaj të Izmirit.
Programi përfshin gjithashtu prezantime të valleve tradicionale dhe koncerte, ndërsa organizimi synon të kontribuojë në forcimin e mëtejshëm të lidhjeve historike dhe kulturore ndërmjet dy popujve.
Ndryshe, aktiviteti “Ditët e Kosovës” u hap dje në praninë e Kryetarit të Komunës Izmir, Cemil Tugay, Guvernatorit të Izmirit, Süleyman Elban, ministrit të Punëve të Brendshme të Kosovës, Xhelal Sveçla, si dhe shumë të ftuarve të tjerë. Në këtë organizim morën pjesë edhe kryetarë dhe përfaqësues të komunave të ndryshme të Kosovës.