Arrestohet në Itali, 23-vjeçari shqiptar kërkohet për vrasje në Gjermani

Në aeroportin e Malpensas në Itali, është arrestuar një 23-vjeçar shqiptar, person në kërkim në Gjermani për një vrasje në qytetin Aachen. Sipas mediave italiane, shqiptari ishte nisur me avion drejt Tiranës, por u zbulua se kërkohet nga autoritetet gjermane.

Emri i tij nuk është bërë i ditur dhe në sistemin e policisë çuditërisht ai rezultonte i pastër. Por, nisur nga intervistimi që iu bë dhe verifikimet e mëtejshme, policia italiane zbuloi në fakt se ndaj tij ka një urdhër arresti.

Shqiptari që rezultonte në kërkim ndërkombëtar, akuzohet për vrasjen e një vajze 18-vjeçare në Gjermani gjatë një grabitje të ndodhur në Janar të vitit 2017. Adoleshentja mbeti e plagosur nga goditja me thikë, por ndërroi jetë në spital. Pas grabitjes me pasojë vrasjen, 23-vjeçari ishte arratisur nga Gjermania. Tashmë i arrestuar në Itali, ai do të ekstradohet në shtetin gjerman për t’u përballur me akuzat.