Nis viti i ri shkollor me 480 mijë nxënës

Sot nisi viti i ri shkollor me 480 mijë nxënës që do të ulen në bankat e shkollës.

Me këtë rast, ministrja e Arsimit, Sportit dhe Rinisë, Lindita Nikolla, duke uruar nxënësit përmes kazanit të Edi Ramës, ERTV, tha se reforma në arsim ka si kryefjalë përmirësimin i cilësisë së shërbimit për të gjithë nxënësit.

“Ky është viti i parë i teksteve falas për nxënësit deri në klasën e katërt, 190 mijë nxënës pra, 610 milionë lekë të dedikuara nga taksat tuaj, që u kthehen përmes librave. Fëmijët me aftësi të kufizuar janë fokusin tonë, këtë vit 700 mësues që do trajnohen në mënyrë permanente për t’ju ardhur në ndihmë kësaj kategorie”, tha Nikolla duke shtuar se do të vijohet me 50 shkolla në 12 qarqe të vendit të bëjnë detyrat e shtëpisë, duke kaluar barrën e mësimeve nga ju te shkolla për ti përgatitur mësimet për nesër.”

Falë reformës në gjimnaze, tha ministrja Nikolla sot gjimnazi është i unifikuar dhe i orientuar drejt karrierës.

“Këtë vit do të jenë 39 000 maturantë që do të mbyllin njëherë e për gjithnjë hendekun e krijuar mes gjimnazit-universitetit dhe tregut të punës. Ky vit shkollor sërish me klasa sportive që jeta juaj të jetë më e shëndetshme. Falë investime me standarde kemi 26 shkolla të reja për 10 000 nxënës. Shkollat janë kthyer në qendra komunitare. Pra jemi më pranë një shkolle që ju i drejtoheni me gëzim. Një shkolle që i përket shekullit të 21 që formon në dije dhe mendim ashtu si dhe shkollat e tjera perëndimore”, tha ministrja e Arsimit, Sportit dhe Rinisë, Lindita Nikolla, duke bërë me dije se Qeveria do të mundësojë financimin e studentëve më të mirë për t’ju drejtuar mësuesisë dhe se emërimet jo më politike, por vetëm përmes portalit mësues për Shqipërinë.