Kaliforni, të shtëna me armë në një bar, 12 të vdekur e shumë të plagosur…

Të paktën 12 persona , duke përfshirë një oficier policie, janë vrarë nga një person që qëlloi me armë në një bar në Thousand Oaks, Kaliforni.

Policia konfirmoi se i dyshuari gjithashtu ka vdekur.

Zyrtarët e SWAT dhe të paktën katër ambulanca mbërritën në vendin e ngjarjes.

Të shtënat filluan mbrëmë rreth orës 23:20  në Borderline Bar and Grill rreth 65 kilometra në veri-perëndim të Los Anxhelosit.

Të paktën 200 persona raportohet se kanë qenë brenda në bar gjatë kohës kur ndodhi incidenti i rëndë.

“Mund t’ju them se ka shumë viktima, plagosje të shumta dhe një nga ata është edhe një polic që shkoi në vendngjarje, si edhe personi që qëlloi me armë,”-tha policia, ndërsa shtoi se numri i të lënduarve pritet që të rritet.

Afërsisht 30 të shtëna janë dëgjuar, tha një burim për mediat lokale.

Dëshmitarët thanë se i armatosuri qëlloi fillimisht rojën në derën e barit, hodhi bomba tymuese brenda më pas filloi të qëllonte me armë.

Për të shpëtuar ata përdorën karrige për të thyer dritaret, ndërsa të tjerë u strehuan brenda tualeteve.

Raportet thonë se i dyshuari mund të ketë përdorur granata tymi dhe të paktën një armë, e përshkruar nga dëshmitarët si një pistoletë gjysmë-automatike.